भांगरभूंय | प्रतिनिधी
गिन्यान खंय सगल्यांत बळिश्ट शक्त. अशें म्हणटात एकादो मनीस जितलें चड वाचन करता, ताचें ज्ञान तितलें चड वाडटा. मनशाक आपले जिणेंत एकादे गजालेची आवड निर्माण जाता, देखीक कोणाक वाचपाची, खेळपाची, नाचपाची आनी हेर. फकत बरी न्हय तर वायट आवड सुद्दा आसता. तिच्या आदारान मनशाचो फुडार पर्जळटलो काय ना हाची जाणीव ताका जाता.
ल्हानपणांत शाळेंत आसतना विद्यार्थांक शिक्षक वाचनाची आवड निर्माण करात, दिसान एकदा तरी वाचन करात अशी शिटकावणी दिताले. वांगडा एकादें लेखकाचें पुस्तक वाचपाक दिताले, पूण तें फकत थारावीक विद्यार्थीं आयकताले आनी उरलेलीं भुरगीं काना- मनार घेनासलीं, हो आमचो सगल्यांचो एका विद्यार्थीं म्हूण प्रामाणीक स्वभाव आसलो. पूण जशी आमची पिराय वाडत गेली, वाडट्या वया वांगडा आमकां फावो तशी बऱ्या वायटाची जाणवीकाय जावंक लागली.
प्रबोधनकार ठाकरे हांचें एक वाक्य आसा, वाचता तो वाचता. आमी आमचे दिसपट्टे जिणेंत जितलें चड वाचन करतात तितलीं आमकां नवीं उतरां शिकूंक मेळटात. पयलींच्या काळार तशीं वाचपा खातीर पुस्तकां आसतालीं, पूण कमी प्रमाणान मेळटालीं. आयचे पिळगेंक वाचन करपाक भरपूर माध्यमां आसात. इतलें सगलें आसून लेगीत आयची पिळगीं वाचना कडल्यान पयस गेल्ल्याची जाणवता. हाचें मूळ कारण घडये जायते आसूये, पूण आतांचीं भुरगींच न्हय तर तांच्या बरोवर हेरूय वाचनाच्या आवडी कडल्यान पयस वतात, अशें जाणवता.
आयज आमका जायतें लेखन, पुस्तकां ऑनलायन पिडीएफाच्या माध्यमांतल्यान वाचपाक मेळटा. आयच्या काळान मनीस इतलो व्यस्त जाला तातूंतल्यान ताका एक सादी बातमी वाचपाक वेळ नासता. तें भायर आयची पिळगी एकादें कितें वाचले उपरांत ताचो अर्थ पुराय समजपा पयलींच वेगळोच अर्थ लायता. फकत वाचन केलें म्हूण जायना, पूण त्या वाचनांतल्यान आपणाक कसली बरी देख शिकपाक मेळटली आनी आपूण तातूंतल्यान कितें शिकतलों, हो हेतू घेतलो जाल्यार खरेंच मनीस फकत तोंडान बडायो मारपा परस गिन्यान घेवन मौन बसून दुसऱ्यांचें मत जाणून घेतलो.
विष्णू नार्वेकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
