भांगरभूंय | प्रतिनिधी
पणजी: मुख्यमंत्र्यांनी अर्थ संकल्पीय भाशणांत लोकशक्तीचो उल्लेख केल्लो. पूण सद्या गोंयांत भाजपा सरकारा कडल्यान अघोशीत आणिबाणी लादल्या. सरकार लोकांचो आवाज चेपत आसा. एनजीओ, विरोधी विचारांच्या लोकांक पुलीस हेतुपुरस्सर लक्ष्य करीत आसात. गोंयांत मुक्त विचार करपी लोकांक धमकायतात अशें विरोधी पक्ष फुडारी युरी आलेमांव हांणी म्हणलें. बुधवारा विधानसभेंत अर्थ संकल्पीय चर्चेंत ते उलयताले.
आलेमांव हांणी म्हणलें की, मुख्यमंत्र्यांनी अर्थ संकल्पांत लोकांक फटीचीं आस्वासनां दाखयलीं. गोंयच्या न्यायालयांनी लोकांच्या हिता खातीर दिल्ल्या निर्णयांक गोंय सरकार सर्वोच्च न्यायालयांत आव्हान दिता.
व्याघ्र प्रकल्प, नगरनियोजन प्रकरणांत सरकार लोकांचें पयशे घालून सर्वोच्च न्यायालयांत धांव घेता. हे खातीर वकिलांक लाखांनी रुपया दिता. सरकाराक लोकांचे हीत नाका. सरकाराक गोंयच्यो जमनी, दोंगर, शेतां विकून सर्वनाश करपाचो ध्यास लागला.
आलेमांव हांणी मुखार म्हणलें, गोंय बलात्कार आनी खुनांची राजधानी म्हूण वळखतात. कायदो आनी सुवेवस्था इबाडल्या. पुलीस, ईडी, सीबीआय कडल्यान विरोधी फुडाऱ्यांक लक्ष्य करतात. गोंयची अर्थीक स्थिती सुमाराची आसा. अर्थ संकल्पांतलो फक्त 30 टक्के निधी विकास कामां खातीर शिल्लक उरता. उरिल्लो निधी निवृत्त वेतन, वेतन, रीण दिवपाक सोंपता. भलायकी मळार खवदळ पडला. उण्या मनीसबळाक लागून दुयेंतींचे हाल जायत आसात. शिक्षण मळार आनीक निधी मेळप गरजेचें आसा.
गोंयांतली सद्याची परिस्थिती पळयत जाल्यार तरणाटे, बायलां, ज्येश्ठ नागरीक, रस्ते, आमची अस्मिताय, एकवट सुरक्षीत आसा? हाची जाप सरकारान दिवची अशी मागणी युरी आलेमांव हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
