भांगरभूंय | प्रतिनिधी
वास्को: भाजी मार्केटांतल्या विक्रेत्यांचें अतिक्रमण सोंसून घेवचे ना. तांणी आखून दिल्ले सुवातेरूच आपलो माल मांडचो, असो उलो मुरगांवचे नगराध्यक्ष गिरिष बोरकार हांणी बुधवारा जोड बसकेंत मारलो. ह्या मार्केटांत शौचालय, पिवपाचें उदक आनी हेर सुविधा दिवपाची आमी यत्न करतले अशें आस्वासन तांणी दिलें. विक्रेत्यांनीय समाधान उक्तायतना योग्य तें सहकार्य करपाचें आस्वासन दिलें.
विक्रेत्यांनी रस्त्यार अतिक्रमण करिनासतना हेरांकूय वेवसाय करपाक दिवचो, अशें ज्येश्ठ विक्रेते तुबकी हांणी सांगलें.
शेनवारा एका विक्रेत्याक रस्त्यावेली हातगाडी काडपाक लायले उपरांत तांणी सफाय कामगारांक आनी नगरसेवक नारायण बोरकार हांकां धमकी दिल्ली. ते धमकेची दखल घेतना नगराध्यक्ष बोरकार हांणी थंयच्या रस्त्यावेलें अतिक्रमण आनी दुकानां मुखार लायिल्ले प्लास्टीक काडिल्लें. आयतारा कांय जाणांचो माल जप्त केल्लो. फाटले चार दीस थंय सेगीत कारवाय केल्ल्यान रस्ते मेकळे जाल्ले. हाका लागून गिरायकांनी समाधान उक्तायल्लें. ह्या प्रकरणांत कांय विक्रेत्यांनी मदीं पडपाचो यत्न करतना बुधवारा एके बसकेचें आयोजन केल्लें. हे बसकेक नगराध्यक्ष बोरकार आनी नगरसेवक बोरकार हजर रावले.
ज्या विक्रेत्यान दादागिरीची भास वापरून धमकी दिल्ली, ताका मुखार हाडून चूक मागपाची तयारी कांय विक्रेत्यांनी केली. तशेंच ताची गरज नाशिल्ल्याचें नगरसेवक बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
