भांगरभूंय | प्रतिनिधी
पणजी : गोंयांत देशा खाला आनी परदेशी पर्यटकांच्या आंकड्यांत मात्शी वाड जाल्ल्यान, फाटल्या स म्हयन्यांत वट्ट ५४ लाख पर्यटकांनी गोंयाक भेट दिल्या. हातूंत वर्साच्या पर्यटनाकूय बरो प्रतिसाद मेळटा अशें पर्यटन मंत्री रोहन खंवटे हांणी सांगलें.
गोंय आतां बारा म्हयने पर्यटना खातीर पर्यटकांचें आकर्शण केंद्र जालां. नवें चार्टर ऑपरेटर अतिरिक्त विमानां वरवीं येता, हाका लागून परदेशी पर्यटकांचो आंकडो वाडपाची अपेक्षा आसा, अशें खंवटे हांणी म्हणलें. हिंटरलँड पर्यटन चालीक लावप, पर्यटनाचे नदरेन उदरगत करप आनी पर्यटकांक मुळाव्यो सुविधा उपलब्ध करून दिवप हो सरकाराचो मुखेल हेत आशिल्ल्याचें नमूद केलें.
पर्यटन खात्यान विमान कंपनी, हॉटेल वेवसायीक आने टूर ऑपरेटर अश्या विवीध भागधारकां सयत एकठांय बसून पर्यटकांक आनीक बर्यो सुविधा आनी पॅकेजेस उपलब्ध करून दिवपाचें धोरण राबोवचें, अशेंय मंत्री खवंटे हांणी स्पश्ट केलें.
सांजांव आणि चिखलकालो अश्या उत्सवांक संवसारीक पटलाचेर वळख मेळटा अशें तांणी म्हणलें. राज्यांतल्या पर्यटन मळार सेगीत सुधारणा जाता, प्रचार आनी ब्रँडिंग उपक्रमाक लागून गोंयच्या पर्यटन मळार विस्वास आनीक घटमूट जालो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
