भांगरभूंय | प्रतिनिधी
पणजी : चवथ लागीं पावल्या तशी श्री गणेशाच्या मुर्त्यांची मागणीय वाडत आसा. हेच फाटभूंयेर सध्या प्लास्टर ऑफ पॅरीस (पीओपी) सावन केल्ल्या गणेश मुर्त्यांक लागून पर्यावरणाक आनी भौशीक भलायकेक धोको निर्माण जाता. हें लक्षांत घेवन राज्य सरकारान पीओपी मुर्तींच्यो विक्री, उत्पादन आनी आयातीचेर बंदी घालपाचे निर्देश जारी केल्यात.
१ ते १४ ऑगस्ट २०२५ मजगतीं गोवा राज्य प्रदूशण नियंत्रण मंडळ, गोवा हस्तकला महामंडळ आनी संबंदीत उपजिल्लोधिकारी कार्यालया वतीन राज्यभरांतल्या चित्रशाळांची तपासणी करतले. पीओपी मुर्ती विकपी चित्रशाळांचे परवाने रद्द करतले, मुर्ती जप्त करतले, तशेंच गरज पडल्यार दुकानांची सुवातूय सील करतले, अशे स्पश्ट निर्देश सरकारान दिल्यात.
पीओपी मूर्तींची येरादारी करपी गाडयांक तेन्नाच आडावन कारवाय करची, अशे राज्यांच्या शिमेचेर खर तपासणेचे आदेश अबकारी आनी येरादारी विभागाक दिल्यात. तशेंच २५ जुलय मेरेन नगरपालिका आनी पंचायतींक आपल्या हद्दीतल्या चित्रशाळांची म्हायती गोंय प्रदुशण नियंत्रण मंडळाक सादर करपाचे आदेश दिल्यात. पर्यावरण विभागाचे हे आदेश मोडप्यां आड पर्यावरण संरक्षण कायद्या खाला गुन्यांव नोंद करतले, अशी शिटकावणी सरकारान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
