भांगरभूंय | प्रतिनिधी
पंचायत संचालनालय आनी उत्तर गोंय जिल्लोधिकार्यांकडेन लेखी निवेदन सादर
पेडणें: कासारवर्णेची उपसरपंच साक्षी नायक हांच्या कुटुंबियांनी कासारवर्णे ग्रामपंचायत वाठारांतले सरकारी जमिनीचेर बेकायदेशीर बांदकाम केला. हे खातीर वेगवेगळे घर नंबर वापरतात. हाची दखल घेवन कायदेशीर कारवाय करतना नायक हांकां पंचायत वांगडी म्हणून अपात्र थारोवचें, अशे तरेचें लेखी निवेदन पंच वांगडी वृषाली व्ही. नायक हांणी १७ जुलयाक पंचायत संचालनालय आनी उत्तर गोंय जिल्लोधिकार्यां कडेन सादर केलां.
ह्या लेखी निवेदनांत नमूद केलां की, साक्षी नायक हांचो घोव भिशी उर्फ रूपेश नामदेव नायक आनी तिची माय नीता एन. नायक हांणी कासारवर्णे ग्रामपंचायत वाठारांतल्या पुर्वा हांगचे सरकारी जमनीर कब्जो करून बेकायदेशीर घर बांदला आनी तीं थंय रावतात. तीं वेगवेगळे घर नंबर वापरतात. ही मालमत्ता गोंय सरकाराची. अशे परिस्थितींत गोंय सरकाराच्या वीज आनी बांदकाम खात्या कडल्यान वीज आनी उदकाचे जोडणीच्या बेकायदेशीरपणाक लागून दुबाव निर्माण जाला.
सरकारी जमनीचेर घराचें बांदकाम करपा खातीर खंयच्या खात्यान परवानगी दिली हे विशीं खोलायेन चवकशी करची. अशी मागणी करून उपसरपंच साक्षी बी. नायक हांकां अपात्र थारोवचें, अशी मागणी पंच वृषाली व्ही. नायक हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
