भांगरभूंय | प्रतिनिधी
पणजीः म्हादय विशया वेल्यान विधानसभेंत वातावरण बरेंच तापलें. म्हादय विशयाचेर चर्चा फुडें चालु उरची ही मागणी करीत विरोधकांनी सभापती वटेन धांव घेतली. बोवाळ जाले उपरांत सभापतीन फुडें चर्चा करपाक मान्यताय दिली. उपरांत म्हादय विशयाचेर विशेश चर्चा जावची आनी उदक वळोवपाच्या कामाचेर सप्तकी नियाळ दिवपाची मागणी केली.
कुडटरीचे आमदार आलेक्स रेजिनाल्ड लाॅरेन्स हांणी म्हादयचें उदक वळोवपाची स्थिती कितें आसा अशी जाप विचारली. कर्नाटक उदक वळोवपा खातीर लिपून गजाली करीत आसा. हे खातीर सरकार कसलीं पावलां उबारता? असो प्रस्न तांणी विचारलो. सरकार हे बाबतींत वेळा वेळार अवमान याचिक दाखल करता अशी जाप उदकास्रोत मंत्री सुभाष शिरोडकार हांणी दिली.
एका न्युज चॅनलाचे बातमेच्या आदाराचेर फातोड्डेंचे आमदार विजय सरदेसाय हांणी सांगलें, कर्नाटकान नेलसे रान वाठारा भितर पायपां तयार करपाचें युनीट घालां. तांकां परवानगी मेळ्ळी जाल्यार ते सप्तका भितर हें पायपांतल्यान म्हादयचें उदक वळोवन मलप्रभाच्या नवल तिर्थ धरणांत सोडटले. तशेंच म्हादय विशीं स्थापन केल्ली गृह समितीचो काय फायदो ना. ही समिती बरखास्त करची अशी मागणी सरदेसाय हांणी केली.
हाचेर जाप दितना मुख्यमंत्री डॉ. सावंत हांणी कर्नाटक असल्यो गजाली करता हे मान्य केलें. हावेन दिल्ली केंद्रीय पर्यावरण मंत्र्याक मेळून ह्या कामाक परवानगी दिल्या काय असो प्रस्न केलो. ह्या कामाक पर्यावरण आनी रान मंत्रालयान कसलीच परवानगी दिवंक ना आनी ह्या फुडें लेगीत तांकां परवानगी दिवचे ना अशें आस्वासन केंद्रीय मंत्र्यान आमकां दिला, अशें स्पश्टीकरण मुख्यमंत्र्यान दिवन हे विशीं अवमान याचिका सर्वोच्च न्यायालयांत दाखल करतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
