भांगरभूंय | प्रतिनिधी
न्यायालयीन याचिकांक लागून २२७ कोटी आडकले
पणजी : उद्येगीक, घरगुती, शेती तशेंच हेर मेळोन विंगड विंगड कारणां खातीर २०२४ – २०२५ अर्थीक वर्सा मेरेन ५७२.२४ कोटींचीं वीज बिलां प्रलंबीत आसात. २०२४-२५ अर्थीक वर्सा न्यायालयीन याचिकांक लागून २२७.२३ कोटींचीं बिलां प्रलंबीत आसात. विरोधी पक्ष फुडारी युरी आलेमाव, एल्टन डिकोस्ता आनी कार्लोस फेरेरा हांच्या लेखी प्रस्नाक वीजमंत्री सुदिन ढवळीकार हांणी सभाघरांत जाप दिली.
२०२०- २१ ते २०२४ -२५ मेरेन वीज थकबाकीची आकडेवारी वीजमंत्री सुदिन ढवळीकार हांणी सादर केली.
फाटल्या ५ वर्सांची आंकडेवारी पळयली जाल्यार दर वर्सा ४०० ते ७०० कोटीमेरेन थकबाकी आसा.
न्यायालयीन याचिकामदी गुंथिल्ले थकबाकी सयत फाटल्या ५ वर्सांची थकबाकी अशी आसा :
फकत न्यायालयीन याचिकांक लागून प्रलंबीत थकबाकी :
२०२० – २०२१ : १११.१२ कोटी
२०२१ – २०२२ : १३७.५७ कोटी
२०२२ – २०२३ : १६२.७० कोटी
२०२३ – २०२४ : १९२.१० कोटी
२०२४ – २०२५ : २२७.२३ कोटी
न्यायालयीन याचिका सोडून आशिल्ली वीज बिलांची थकबाकी :
२०२० – २०२१ : ३१४.४३ कोटी
२०२१ – २०२२ : ४१६.९६ कोटी
२०२२ – २०२३ : ४५२.२१ कोटी
२०२३ – २०२४ : ५००.३७ कोटी
२०२४ – २०२५ : ३७९.४२ कोटी
वीज बिल थकीत उरलें जाल्यार वीज जोडणी तोडपा खातीरची नोटीस दिता. १५ दिसां भीतर थकबाकी भरली ना, जाल्यार वीज जोडणी तोडपाची शिटकावणी आसता. अर्थीक समस्येक लागून जांका बील फारीक करप शक्य जायना, तांकां हप्त्यानी बील फारीक करपाची सूट आसता. तांंकां डीले पेमेंट चार्जीस लागू जाता, अशी म्हायती वीजमंत्री सुदिन ढवळीकार हांणी दिली. ६ म्हयन्यां परस चड वेळ जालो जाल्यार जोडणी तोडटा. बिलाची थकबाकी वसूल करपा खातीर येणावळ खात्याच्या न्यायालयाकडेन प्रकरण वर्ग जाता.
सरकारान सोलर रूफ टॉप बसोवपा खातीर येवजण सुरू केल्या. सोलर रूफ टॉप येवजणे वरवीं गिरायकांक झीरो बील येतलें. तशेंच सरकाराकूय वीज उपलब्ध जातली, अशी म्हायती वीजमंत्र्यांनी दिली. सोलर रूफ टॉप येवजणे वरवीं वीज तयार जाल्यार वीज खरेदीचो खर्च उणो जातलो.
स्मार्ट मिटरां खातीर ८९ कोटी ११ लाखांची निविदा
स्मार्ट मीटर बसोवपा खातीर खात्यान ८९ कोटी ११ लाखांची निविदा मेसर्स डिजीस्मार्ट नेटवर्क हांंकां जारी केल्या. मिटरांची म्हायती मेळोवपाची प्रक्रीया सुरू आसा. म्हायती मेळयल्या उपरांत काम सुरू जातलें. स्मार्ट मीटरा खातीर केंद्रा कडल्यान ७० कोटी रूपयांचे अर्थीक मजत मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
