भांगरभूंय | प्रतिनिधी
पणजीः गोंयकारांक परवडी दरांत घरांचेर सभाघरांत बरीच चर्चा जाली. सत्ताधारी तशेंच विरोधी आमदारांक जाप दितना मुख्यमंत्र्यान सांगलें, प्रधानमंत्री आवास योजणेचेर केंद्राक फेरविचार करपाक लायतले. तशेंच परवडपी दरांत घर येवजणे खाला जिल्लोधिकार्याक पेडण्यां सुवात सोदपाक सांगलां, अशें आश्वासन मुख्यमंत्री डॉ. प्रमोद सावंत हांणी दिलें. तशेंच जे फक्त तीस वर्सांचो राबितो दाखलो आसा तांकांच गृह निर्माण मंडळाचे फ्लॅट्स आनी प्लॉट घेवपाक मेळटा, अशें स्पश्टीकरण मुख्यमंत्र्यान दिलें.
गृह निर्माण फ्लॅटांची पावणी करून गरीब गरजू लोकांक वंचीत करता असो आरोप नावेलेचे आमदार उल्हास तुयेंकार हांणी केलो.
हे पावणेंत बिल्डरांच्या दरांनी फ्लॅट्स विकिल्ल्यान अर्थीक नदरेन उणे आशिल्ल्या गोंयकारांक ती संद मेळना आनी भायले गिरेस्त लोक हे फ्लॅट्स विकते घेतात. देखून जे १८-२० हजार म्हयन्याक जोडपी तशेंच जो मनीस गोंयांत वा ताचो बापूय गोंयांत जल्मला तांकांच हे फ्लॅट्स घेवपाक दिवचे, अशी मागणी तुयेंकार हांणी केली.
जाल्यार परवडपी दरांत घरां दिवपा खातीर सर्वसमावेक्षक राबितो धोरण तयार करपाचें मुख्यमंत्र्यान आस्वासन दिल्लें खंय गेलें. तशेंच गोंयांत प्रधानमंत्री आवास येवजणे खाला एकय घर कित्याक बांदूंक ना, असो प्रस्न विरोधी पक्ष फुडारी युरी आलेमाव हांणी केलो.
हाचेर जाप दितना मुख्यमंत्री डॉ. प्रमोद सावंत हांणी सांगलें, गोंय गृह निर्माण मंडळाचे फ्लॅट्स आनी प्लॉट्स विकते घेतल्यार १५ वर्सांचो न्हय तर ३० वर्सांचो राबितो दाखलो सक्तीचो आसा. देखून फकत गोंयकारांकूच हे फ्लॅट मेळटात. २०११चे जनगणने प्रमाण गोंयकार पीएम आवास योजणे खातीर कांय जाण पात्र थारताले. ताचेर फेरविचार करपाक केंद्राक सांगलां. परवडपी घर येवजणे खाला पेडण्यां सुवात सोदपाक जिल्लोधिकार्याक कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
