भांगरभूंय | प्रतिनिधी
पणजी : आमदार मायकल लोबो हांणी पावसाळी अधिवेशनाच्या पयल्याच दिसा दाबोळी विमानतळार सेवा उणी जाल्ल्याचो हुस्को उक्तायत म्हणलें, दाबोळी विमानतळार सेवा दिवपी जायत्यो विमान कंपनीं मोपा विमानतळार स्थलांतरीत जाल्ल्यान हाचो परिणाम दाबोळी विमानतळाचेर जाला.
हाका जाप दितना मुख्यमंत्री डॉ. प्रमोद सावंत हांणी, मोपा आंतरराष्ट्रीय विमानतळ सुरू जाले उपरांत गोंयच्या हवाई येरादारींत बरोच व्हड बदल जाला. ह्या नव्या विमानतळा वरवीं आतां मेरेन सरकाराक वट्ट ६५.८८ कोटींचो महसूल मेळ्ळा. सरकाराचो दाबोळी विमानतळ बंद करपाचो कसलोच विचार ना. दोनूय विमानतळ कार्यान्वीत उरतले अशें मुख्यमंत्र्यान स्पश्ट केलें.
सरासरी ५० विमानां सदांच मोपा आनी दाबोळी विमानतळां वेल्यान यो-वच करतात. हाका लागून गोंयांत येवपी विमानांचो आंकडो दुपेटीन वाडला. दाबोळी विमानतळार येवपी विमानां खातीर केंद्र सरकारान सबसिडींत वाड केल्या. हाका लागून सुविधा वाडोवपाचेर सरकार भर दिता. ह्या वेळार ‘मोपा’क लागून गोंयचें पर्यटन आनी हवाई संपर्क सुधारता अशेंय मुख्यमंत्र्यानी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
