भांगरभूंय | प्रतिनिधी
मुख्यमंत्री : 100 टक्के निकाला खातीर पालकांचें सरकारी शाळेक प्राधान्य
भांगरभूंय । प्रतिनिधी
दिवचल : सरकारी शाळांक सरकारा वतीन गरजेच्यो साधनसुविधा दितात. फावोशे शिक्षक दितात. हेच खातीर सरकारी शाळा ही दुय्यम दर्ज्याची अशी आशिल्ली कांय पालकांची संकल्पना बदल्ल्या. आयज कांय पालक सरकारी शाळेंत आपल्या भुरग्यांक घालपाक प्राधान्य दितात. सरकारी शाळांचो निकाल आयज 100 टक्के लागता, ही एक शिक्षणमंत्री ह्या नात्यान आपले खातीर अभिमानाची गजाल दिसता, अशें मुख्यमंत्री डॉ. प्रमोद सावंत हांणी सांगलें.
न्हावेली- सांखळेच्या सरकारी माध्यमीक शाळेचो धावेचो निकाल 100 टक्के लागलो. सगळ्या पास जाल्ल्या विद्यार्थ्यांचो भोवमान सुवाळो न्हावेलीच्या श्री बेताळ देवस्थान सभाघरांत आयोजीत केल्लो. ह्या वेळार मुख्यमंत्री उलयताले.
ह्या सुवाळ्याक माचयेर मुख्यमंत्र्यां वांगडा वेदांत कंपनीच्या मुल्यवर्धीत उद्देगाचे सीईओ सप्तेश सरदेसाय, डेल्टा कॉर्पोरेशन लि. चे सरवेवस्थापक अॅड. प्रेमानंद गांवस, पंच कालिदास गांवस, पालक शिक्षक संघाचे अध्यक्ष चंद्रकांत गांवस, शाळेची मुख्याध्यापक उत्कर्षा नायक हाजीर आशिल्ली.
शिक्षणा खातीर पयशे नाशिल्ल्यान विद्यार्थी शिक्षणा पासून पयस उरपाक शकना, कारण मुख्यमंत्री शिश्यवृत्ती येवजणेंत सगल्यांक आस्पावन घेतात. एसटी समाजांतल्या विद्यार्थ्यांनी हे येवजणेचो लाव घेवचो, शिक्षणांत फाटीं रावचे न्हय. फुडारांत जर नर्सींग वा वैजकी मळार उड्डाण मारपाची मोख आसल्यार विज्ञान फांट्यांतल्यान शिक्षण घेवचें, अशें मुख्यमंत्री डॉ. सावंत हांणी सांगलें.
यत्ता धावीचे परिक्षेंत पयल्या दोन नंबराचेर आयिल्ले साईराज गावडे आनी श्रावणी परवार हांची मुख्यमंत्र्यान वासपूस केली. ह्या दोनूय विद्यार्थ्यांनी जर विज्ञान फांट्यांत बरे गूण घेवन एमबीबीएसांत प्रवेश घेतलो ज ल्यार तांच्या एमबीबीएस शिक्षणाचो पुराय खर्च आपूण करतलों, अशें मुख्यमंत्री डॉ. सावंत हांणी ह्या वेळार जाहीर केलें.
भुरग्यांक शिक्षणा वांगडाच कुशळटाय उदरगत मार्गदर्शनाची गरज आसा. तातूंत सगल्यांत म्हत्वाची भुमिका शिक्षकांची आसा. तांणी विद्यार्थ्यांक योग्य मार्गदर्शन करचें. शिक्षण मळार गरजेची साधनसुविधा, फुडार मार्गदर्शन हे खातीर वेदांत कंपनी समाजीक जापसालदारकी म्हूण काम करता. ह्या उपक्रमांचो लाव विद्यार्थ्यांनी घेवन आपल्या पर्जळीत फुडारा वटेन वाटचाल करची, अशें वेदांत कंपनीचे मुल्यवर्धीत उद्देग सीईओ सप्तेश सरदेसाय हांणी सांगलें. पालक शिक्षक संघाचे अध्यक्ष चंद्रकांत गांवस हांणी येवकार दिलो. यत्ता धावी पास जाल्ल्या सगल्या विद्यार्थ्यांचो तशेंच शाळेच्या शिक्षकांचो मुख्यमंत्री डॉ. सावंत हांचे हस्तुकीं भोवमान जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
