भांगरभूंय | प्रतिनिधी
एल्टन डिकॉस्टा : विधानसभेंत मांडटलो प्रस्न
भांगरभूंय । प्रतिनिधी
केपें : आमदार निधींतल्यान खूबशीं कामां करपाक मेळटात. पूण जेन्ना आमी हो निधी देवस्थानाचे सोबितीकरण वा हेर कामां खातीर खर्च केलो जाल्यार त्या कामा खातीर देवस्थानाचो नाहरकत दाखलो घेवप गरजेचें आसता. मात ते उपरांत ते जमनीर सरकाराचो अधिकार आसतलो, अशें सरकार म्हणटा. हेच खातीर आपणें खूबशीं कामां करपाचीं दवरल्यांत. कारण सरकार देवस्थानाचे जमनीर आपलो दावो खंयच्या आदाराचेर करपाक शकता, असो प्रस्न केपेंचे आमदार एल्टन डिकॉस्टा हांणी उपस्थीत केलो. ह्या विधानसभा अधिवेशनांत हो प्रस्न विरोधीपक्ष फुडारी युरी आलेमांव आनी आपूण मांडटलों, अशें तांणी सांगलें. असोल्डेंच्या श्री खुंटी महामाया देवीच्या देवळाच्या आवारांत जिल्हो पंचायत निधींतल्यान बांदिल्ले शेडीच्या उक्तावण कार्यावळींत ते उलयताले.
ह्या वेळार जिल्हो पंचायत वांगडी सिद्धार्थ देसाय, सरपंच भुपेंद्र देसाय, पंच शिल्पा प्रभुदेसाय, रामचंद्र प्रभुदेसाय, सिद्धार्थ कालेकार आनी हेर मानेस्त हाजीर आशिल्ले.
लोकांनी वेंचून दिले उपरांत लोकां खातीर काम केलें जाल्यारूच लोक परतून तुमकां वेंचून हाडयले. फक्त आस्वासनां दिवन लोकांक फटय नासतना खऱ्या अर्थान लोकांक खरीच गरज आशिल्लीं कामां करपाक जाय. अशें केलें जाल्यारूच गांवाची खऱ्या अर्थान उदरगत जावपाक शकता, अशें आमदार डिकॉस्टा हांणी सांगलें.
कसलींच आस्वासनां दिनासतना, कामाच्या खर्चाचें अदमास पत्रक काडिनासतना तांच्यो निविदा काडून तें काम पुराय केल्ले खातीर सिद्धार्थ देसाय हांचें आमदारान कवतूक केलें. कांय आदल्या लोकप्रतिनिधींनी त्या कामाच्या खर्चाचो अदमास काडिल्लो, तेंच काम आतां तांणी केलां, असो दावो आमदार डिकॉस्टान केलो. कांय जाण लोकांची दिशाभूल करतात, तशें आपूण करिना. केपें मतदारसंघांत धर्म कुशीक दवरून आतां मेरेन 10 मांड बांदल्यात, तीन देवळांचें स्वताच्या खर्चान काम केलां, अशेंय तांणी सांगलें.
गांवांतलीं कांय देवळां दरेका वर्धापनदिसाचे कार्यावळी वेळार प्राकारांत मांटव घालता. दर वर्सा ताचेर खर्च करचो पडटा. हे खातीर आमपणे जिल्हो पंचायत निधीचो वापर करून कांय कडेन शेडी बांदल्यांत. त्यो आतां देवळाक फायद्याच्यो पडटात, अशें जिल्हो पंचायत वांगडी सिद्धार्थ देसाय हांणी सांगलें.
आपणे आपल्या कार्यकाळांत उण्यांत उणी तिशेक कामां केल्यांत. लोकांक गरजेचीं आशिल्लींच कामां केल्यांत. तांचो आतां लोकांक फायदो जाता, अशेंय देसाय हांणी सांगले. ह्या वेळार आमदार डिकॉस्टा हांचे हस्तुकीं सिद्धार्थ देसाय हांचो देवस्थाना वतीन शाल आनी नाल्ल दिवन भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
