भांगरभूंय | प्रतिनिधी
पणजी : सोमार सावन सुरू जावपी पावसाळी अधिवेशना खातीव आमदारां कडल्यान ७५० तारांकीत , जाल्यार ३३३० अतारांकीत प्रस्न आमदारां कडल्यान आयल्यात. विरोधकां परस सत्ताधारी आमदारांचो आंकडा चड आशिल्ल्यान सरकार पक्षाचेच प्रस्न चर्चेक येवपाची चड शक्यताय आसा. तशेंच विरोधी कॉंग्रेस, गोवा फॉरवर्ड, आप आनी आरजी आमदारां मदीं मतभेद आशिल्ल्याचें पयलींच दिसून आयिल्ल्यान सत्ताधार्यांक लाव जावपाची शक्यताय आसा.
२१ जुलय ते ८ ऑगस्ट मेरेन चालपी अधिवेशनांत १५ दीस काम चलतलें. अर्थसंकल्पा वांगडा खात्यांच्या मागण्यांचेर चर्चा जावपा वांगडा घरां अधिकृत करपी तीन विधेयका चर्चेक येतलीं.
अधिवेशनांत येवपी सरकारी विधेयकां आजूनय निश्चीत जावंक ना, अशी म्हायती विधीमंडळ कार्यालयान दिल्या. शुक्रार खाजगी कामाचो दीस आसतलो. एकाच दिसा चडांत चड पांच खाजगी प्रस्तावांचेर चर्चा जातली. प्रस्न-जापेच्या सत्रा खातीर लॉट पद्धतीन प्रस्नांची निवड जातली अशें कळटांत विरोधी आमदारांनी पयलींच तिडक उक्तायल्या. हातूंत परत सत्ताधारी आमदारांचो आंकडो चड आशिल्ल्यान प्रश्नोत्तरा सयत चर्चे खातीरय सरकार पक्षाच्या आमदारांकूच कामकाजांत चड वेळ मेळपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
