भांगरभूंय | प्रतिनिधी
रियाध, खबरां संस्था: सौदी अरेबियाचो स्लीपिंग प्रिन्स म्हणून वळख आशिल्लो प्रिन्स अल वलीद बिन खालिद बिन तलाल अल सौद हांकां सुमार २० वर्सांच्या कोमा उपरांत मरण आयलें. राजकुंवराची पिराय ३६ वर्सां आशिल्ली.
एप्रील १९९० वर्सा जल्मल्ले प्रिन्स अल वलीद हे प्रिन्स खालिद बिन तलाल अल सौद हांचे व्हडले पूर. नामनेचे उद्देगपती प्रिन्स अल वलीद बिन तलाल हांचे ते पुतणये. २००५ वर्सा, १५ वर्सां पिरायेचेर लंडनच्या एका लष्करी महाविद्यालयांत शिक्षण घेतना तांचे गाडयेक भिरांकूळ अपघात जाल्लो. हातूंत तांच्या मेंदवाक दुखापत जाल्ली आनी भितरल्यान रक्तस्रावूय जाल्लो. उपरांत तांचेर रोखडेच उपचार जाले. अमेरिकन आनी स्पॅनिश तज्ज्ञ दोतोरांचो पंगडूय तांचेर उपचार करपाक आयले. पूण ताचे उपरांत ते केन्नाच शुद्धीर येवंक नात.
अपघाता उपरांत तांकां रियाधांत किंग अब्दुल अझीज मेडिकल सिटी हॉस्पिटलांत हालयल्लें. थंय ते सुमार दोन दसकां व्हेंटिलेटराचेर उरले.
ताचो बापूय प्रिन्स खालिद हांणी जायते फावटी व्हेंटिलेटर काडपाक विरोध केल्लो. आपल्या पुताक चमत्कारूच बरो करतलो अशी आस्त तांणी दवरिल्ली. मजगतीं, सोशल मिडियाचेर प्रिन्साचे कांय व्हिडियो व्हायरल जाले, जातूंत तांचीं बोटां मात्शीं हालतना दिसलीं. ताका लागून कुटुंबांत आशेचें किरण निर्माण जाल्लें.
आयतारा २० जुलयाक रियादांतल्या इमाम तुर्की बिन अब्दुल्ला मशिदींत अस्र नमाज सोंपतकच तांचे कुडीचेर निमाणें संस्कार जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
