सांखळे अत्याधुनीक STEM लॅबाचें मुखमंत्र्यां हस्तुकीं उक्तावण

भांगरभूंय | प्रतिनिधी

पणजी ः गोंयच्या विद्यार्थ्यां मदीं विज्ञान, तंत्रज्ञान, अभियांत्रिकी आनी गणित ह्या मळार नवनिर्माण आनी डिजिटल कुशळटाय वाडोवपाच्या हेतान मुख्यमंत्री डॉ. प्रमोद सावंत हांणी शेनवारा सांखळेतल्या सरकारी उच्च माध्यमीक शाळेंत अत्याधुनीक STEM लॅबाचें उक्तावण केलें. ही लॅब गोंय सीएसआर प्राधिकरणान ओएनजीसीच्या (ONGC) कॉर्पोरेट सोशल रिस्पॉन्सिबिलिटी (CSR) उपक्रमांतल्यान स्थापन केल्या. गोंयांत अशें तरेच्यो स लॅब स्थापन करपाचो उपक्रम आसा. ही तातुंतलीच एक लॅब.
ह्या लॅबांतल्यान विद्यार्थ्यांक विज्ञान, रोबोटिक्स आनी नव्या तंत्रगिन्यानाच्या माध्यमांतल्यान प्रत्यक्ष शिकपाची संद मेळटली. बदलत्या काळा प्रमाण विद्यार्थ्यांक फुडारा खातीर तयार करपा खातीर हें एक म्हत्वाचें पावल अशें डाॅ. सावंत हांणी सांगलें. विकसीत भारत – 2047 च्या हेतान आनी राष्ट्रीय शिक्षण धोरण 2020 च्या उद्दिश्टां प्रमाण ही लॅब आसा.

ह्या कार्यावळीक उदकास्रोत मंत्री सुभाष शिरोडकार, थळावे प्रतिनिधी आनी शिक्षक हाजीर आशिल्ले. तांणी उत्तर गोंयांतल्या शिक्षणीक मळार हे एक व्हड पावल अशें सांगलें. विद्यार्थ्यां मदीं अणभवात्मक शिकप, विचार करपाची तांक, समस्या सोडोवपाची कुशळटाय आनी जिज्ञासा वाडोवपाक ही लॅब उपेगी थारतली. हो उपक्रम सैध्दांतिक शिक्षण आनी प्रत्यक्ष अणभव हांचे मदलो फरक भरून काडटलो अशी आस्त शिक्षकांनी उक्तायली.
ह्या STEM लॅबा वरवीं गोंयान आधुनीक शिक्षण पद्दती आपणावपाचे नदरेन फुडाकार घेतला. राज्यांतल्या तरणाट्यांक नवनिर्माण आनी गिन्यानाचेर आदारिल्ले अर्थवेवस्थे खातीर सशक्त करपाचो सरकाराचो हेत आसा.