भांगरभूंय | प्रतिनिधी
पणजी: गर्मीच्या दिसांनी लेगीत गोंयांक भेट दिवपी पर्यटकांचो आंकडो वाडला. फाटल्या 6 म्हयन्यांत 54 लाखां परस चड पर्यटकांनी गोंयांत भेट दिली.
अधिकृत आंकडेवारी प्रमाण, अंदूं जानेवारी ते जून मजगतीं गोंयांत वट्ट 54.55 लाख पर्यटकांनी भेट दिली. तातूंत 51.84 लाख देशी तर 2.71 लाख विदेशी पर्यटक आशिल्ले. जानेवारी म्हयन्यांत पर्यटकांची सगळ्यांत चड गर्दी जाल्ली. ह्या वेळार 10.56 लाख पर्यटकांनी भेट दिली. तातूंत 9.86 लाख देशी आनी सुमार 70 हजार विदेशी पर्यटक आशिल्ले.
ताचे उपरांत फेब्रुवारींत 9.05 लाख पर्यटकांनी गोंयांक भेट दिली. तातूंत ८.४४ लाख देशी तर 61,000 वयर विदेशी पर्यटक आशिल्ले. मार्चांत 8.89 लाख पर्यटकांनी गोंयांक भेट दिली. तातूंत 8.32 लाख देशी तर 56,000 वयर विदेशी पर्यटक आशिल्ले.
एप्रीलांत 8.42 लाख पर्यटकांनी गोंयांक भेट दिली. तातूंत 8.14 लाख देशी तर 28,000 विदेशी पर्यटक आशिल्ले. जाल्यार मे म्हयन्यांत 9.27 लाख पर्यटक गोंयांत आयलें. तातूंत 8.97 लाख देशी तर सुमार 30,000 विदेशी पर्यटक आशिल्ले. जूनांत वट्ट 8.34 लाख पर्यटक आयलें. तातूंत 8.08 लाख देशी तर 25,000 विदेशी पर्यटक आशिल्ले.
आमी मुखेल स्रोत बाजारांत, देशी आनी संवसारीक पांवड्यार प्रचार मोहीम चड खर केल्यात. ह्या यत्नांक लागून दृश्टीकोन वाडला. तशेंच गोंयची वळख फकत दर्यादेग न्हय तर ट्रेल्स आनी दायज ते आध्यात्मिक आनी वेलनेस रिट्रीट्स मेरेन विंगड विंगड अणभव दिवपी थळ म्हणून घटमूट केला पर्यटन संचालक केदार नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
