भांगरभूंय | प्रतिनिधी
85 जणांची सुटका, 20 जणांक अटक
विशाखापट्टणम, खबरां संस्था : आंध्र प्रदेश पुलिसांनी आंतरराष्ट्रीय मानव तस्करी रॅकेट उक्ताडार हाडले. ह्या प्रकरणांत 85 तरणाट्यांक सोडयल्यात आनी 20 आरोपींक अटक केल्या. ह्या तरणाट्यांक दक्षीण आशियांतल्या बनावट डेटा एंट्री नोकऱ्यांचें हांयस दाखोवन ऑनलायन फटवणूक करपी स्कॅम केंद्रांनी धाडटाले.
14 जुलयाक चार तरणाट्यांक कंबोडियांत व्हरतना विशाखापट्टणम विमानतळार सुरेश आनी आदिलक्ष्मीक ह्या दोन एजंटांक अटक केली. हे प्रकरण आंतरराष्ट्रीय सायबर गुन्यांवां आड सुरु आशिल्ल्या व्यापक मोहिमेचो एक भाग. आतां मेरेन अशे तरेचे णव मानव तस्करी प्रकरणां नोंद जाल्यात. ही म्हायती विशाखापट्टणम पुलीस आयुक्त संखब्रता बागची हांणी पत्रकार परिशदेंत दिली.
फटींच्या नोकऱ्यांच्या नांवान फटवणूक
पुलिसांनी दिल्ले म्हायती प्रमाण, ह्या तरणाट्यांक कंबोडिया, म्यानमार, थायलंड आनी लाओसांतल्या स्कॅम केंद्रांनी धाडटाले आनी थंय तांकां जबरदस्तीन ऑनलायन गुन्यांव करपाक लायताले. तातूंतले चडशे तेलुगू भास उलोवपी आंध्र प्रदेश आनी तेलंगनाचे तरणाटे आसात. सध्या म्यानमार आनी कंबोडियांत सुमार 500 तरणाटे आडकून उरल्यात अशी म्हायती तपास एजन्सीनी दिल्या.
अटक केल्लो सुरेश हाचे आदीं कंबोडियांतल्या सायबर गुन्यांव केंद्रांत काम करतालो आनी उपरांत भारतांत परतून येवन तरणाट्यांक भरती करपाक लागलो अशें पुलीस आयुक्त बागची हांणी सांगलें. ह्या रॅकेटाचो मुखेल मास्टरमायंड विजयकुमार उर्फ सनी आसा. ह्या तरणाट्यांक बनावट शेअर, क्रिप्टोकरंसी आनी डिजिटल भांगर अशा गुंतवणूक येवजण्यां वरवीं ऑनलायन फटवणूक करपाक लायताले. हातूंतल्यान मेळिल्ल्या काळ्या पयशांचें जायत्या थरांतल्यान क्रिप्टोंत रुपांतर करून सिंगापूरांतल्यान धाडटाले. मजगतीं, हालींच अटक करतना पुलिसांनी दोन मोबायल फोन, 20 सिम कार्ड, 50,000 रोख रक्कम आनी 2,000 डॉलर (सुमार 1.8 लाख रुपया ) जप्त केल्यात.
हेल्पलायन सुरू
ह्या प्रकरणांत बळी पडपी आनी तांच्या कुटुंबा खातीर विशाखापट्टणम पुलिसांनी 79950 95799 हो खाशेलो हेल्पलायन नंबर सुरू केला. तशेंच तरणाट्यांनी परदेशांत नोकरी घेवचे पयलीं संघटनेची फाटभूंय तपासची असो उलो बागची हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
