पेडणें म्हाल लखपती दिदींत मुखार

भांगरभूंय | प्रतिनिधी

पणजीः पेडणें म्हालांत आपमजत गटाच्यो सगल्यांत चड बायल वांगडी लखपती दिदी जाल्यात. पेडणें म्हाल 3 हजार लखपती दिदी सयत पयले सुवातेर आसा, सत्तरी म्हाल 2900 लखपती दिदी सयत दुसरे सुवातेर जाल्यार फोंडें म्हाल अडेज हजार लखपती दिदी सयत तिसरे सुवातेर आसा अशी म्हायती ग्रामीण उदरगत खात्यान दिली.

आपमजत गटांतल्या बायल वांगड्यांची वर्सुकी येणावळ 1 लाख वयर व्हरपा खातीर लखपती दिदी ही येवजण काम करता. हे येवजणे खाला गोंयच्या 4046 आपमजत गटांचो आस्पाव केला. ह्या चार हजार आपमजत गटांच्यो 55,699 बायल वांगडी आसात आनी तातूंतल्यो 19,339 ह्यो लखपती दिदी म्हूण नोंद जाल्यात. ह्या लखपती दिदींचे 141 समुदाय संसधान व्यक्ती (सीआरपी) तांचे मार्गदर्शन करतात. तशेंच दोन मास्टर ट्रेनर्स आनी तांच्या येणावळीची नोंद दवरपा खातीर 40,496 डिजिटल आजिविका रजिस्टर आसात.

उत्तर गोंयांत 12,169 बायलो लखपती दिदी म्हूण नोंद जाल्यात. तांचे खातीर 70 सीआरपी आनी 21,298 डिजिटल आजिविका रजिस्टर आसात, जाल्यार दक्षीण गोंयांत 7,170 बायलाे लखपती दिदी म्हूण नोंद जाल्यात. तांचे खातीर 71 सीआरपी आनी 19,198 डिजिटल आजिविका रजिस्टर आसात.

उत्तर गोंयांत फाटल्या वर्सा बार्देस म्हाल लखपती दिदींत पयले सुवातेर आसलो. अंदूं पेडणें म्हालान बार्देसाक फाटीं उडयत पयली सुवात मेळयल्या. जाल्यार सत्तरी म्हालान दुसरी सुवात घेवन बार्देसाक तिसरे सुवातेर धुकल्ला.

सगल्यांत चड 3,712 लखपती दिदी पेडणें म्हालांत नोंद जाल्यांत आनी आठ सीआरपी तांचे मार्गदर्शन करतात. सत्तरींत 2,980 लखपती दिदींक 9 सीआरपी, बार्देसांत 2,026 लखपती दिदींक 16 सीआरपी, दिवचले 1,878 लखपती दिदींक 11 सीआरपी आनी तिसवाडीत 1,573 लखपती दिदींक 26 सीआरपी मार्गदर्शन करतात.

दक्षीण गोंयांत सगल्यांत चड 2,551 लखपती दिदी फोंडें म्हालांत नोंद जाल्यांत आनी 20 सीआरपी तांचे मार्गदर्शन करतात, काणकोणां 2,033 लखपती दिदींक 8 सीआरपी, धारबांदोड्यां 348 लखपती दिदींक 8 सीआरपी, मुरगांव 384 लखपती दिदींक 5 सीआरपी, केप्यां 1,064 लखपती दिदींक 8 सीआरपी, साश्टीत 470 लखपती दिदींक 12 सीआरपी आनी सांग्यार 320 लखपती दिदींचे 10 सीआरपी मार्गदर्शन करतात.