भांगरभूंय | प्रतिनिधी
विद्यापिठाच्या इतिहासांत पयलेच खेपे मान
भांगरभूंय । प्रतिनिधी
पणजी : गोंय विद्यापिठान राष्ट्रीय मुल्यांकन आनी मान्यता परिशदेच्या (NAAC) नवे अॅक्रिडिटेशन सायकलींत A+ ग्रेड मेळयलां. हें इतिहासीक येस आसा. विद्यापीठाक 3.3 असो सीजीपीए मेळ्ळा. ही मान्यताय 2030 मेरेन वैध उरतली. हाचे आदीं विद्यापीठाक ई+ रेटींग आशिल्ली.
विद्यापिठाचो शिक्षणीक दर्जो, संशोधन काम, मुळाव्यो सुविधा आनी विद्यार्थ्यांक दिवपी सुविधां विशीं उत्कृश्ठ उदरगत जाल्या, हें हाचे वयल्यान कळटा. मुख्यमंत्री डॉ. प्रमोद सावंत हांणी गोंय विद्यापिठाक मेळिल्ल्या ह्या येसाक लागून परबीं भेटयतना म्हणलें, विद्यापिठाच्या इतिहासांत पयलेच फावट मेळिल्ली ही मान्यताय राज्याच्या शिक्षण मळा वयल्या सातत्यपूर्ण उदरगतीचें प्रतीक आसा.
हाचे पयलीं 2014 ते 2019 ह्या काळांत विद्यापिठाक ए ग्रेड (सीजीपीए 3.01 ते 3.25) मेळिल्ली. मात, 2022 ते 2027 खातीर विद्यापिठाक ई++ ग्रेड दिल्ली. अंदूं मेळिल्ली ए+ ग्रेड ही ताचे तुळेंत व्हड उदरगत मानतात.
नॅकचें मुल्यांकन प्रक्रियेंत 70 टक्के गूण शुद्ध आंकड्यांचेर आदारून आसतात. जशें शिक्षकांची शिक्षणीक पात्रताय, कायम स्वरूपी शिक्षकांची संख्या, रित्या पदांची स्थिती आनी हेर गजाली. उरिल्लें 30 टक्के मुल्यांकन नॅकच्या तज्ञ समितीच्या प्रत्यक्ष भेटी उपरांत करतात.
A+ मानांकनाक लागून प्लेसमेंटा सयत संशोधना खातीर अदीक निधी मेळपाक विद्यापिठाक मजत मेळटली. फाटल्या पांच वर्सांतली विद्यापिठाची कामगिरी आनी साधन सुविधांची म्हायती योग्य तरेन नॅक मानांकन समितीक पटोवन दिवपाक येस आयिल्ल्यानूच A+ मानांकन मेळोवपाक विद्यापीठ येसस्वी थारलां, अशी प्रतिक्रिया विद्यापिठाचे कुलसचीव सुंदर धुरी हांणी उक्तायली. फाटले खेपे म्हणल्यार 2019 त कामगिरी आनी साधन सुविधांचें सादरीकरण खूबश्यां कारणांक लागून नॅक समिती मुखार योग्य तरेन विद्यापिठाक करपाक जावंक नाशिल्लें. फाटले खेपेचो उणाव हे खेपे भरून काडपाक येस आयिल्ल्यानूच A+ मानांकन मेळोवप शक्य जालें, अशें धुरी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
