भांगरभूंय | प्रतिनिधी
पणजीः कायदो आनी सुवेवस्थे वेल्यान कॉंग्रेसीन भाजपाचेर टिका केल्या. राज्यांत गुन्यांवकारी घडणुको वाडत चल्ल्या. बायलां आडच्या अत्याचाारांत ९० टक्के वाड जाल्या, मात सरकार गंभीर ना. मुख्यमंत्र्यान आपलीं खातीं दुसर्या मत्र्यांक दिवन फक्त कायदो सुवेवस्थेचेर लक्ष दिवचो, असो सल्लो कॉंग्रेसीन दिला.
गोंय प्रदेश युवा कॉंग्रेसीन राज्यांत वाडट्या गुन्यांवगारी घडणुकांचो निशेध करपा खातीर निर्दशनां केलीं. पणजे कॉंग्रेस हावसा सकयल जाल्ले रेलींत गोवा प्रदेश कॉंग्रेस तशेंच युवा कॉंग्रेशीचे वांगडी हजर आशिल्ले. ह्या वेळार उलयतना कॉंग्रेशीचे कुंभारजुवा मतदारसंघातले फुडारी समिल वळवयकार हांणी सांगलें, राज्यांत कायदो आनी सुवेवस्था कोसळत चल्ल्या आनी ताची जापसालदारकी सरकार कशीच घेवपाक सोदना. सरकाराचें नियंत्रण नाशिल्ल्यान बायलां आनी तरणाटे सुरक्षीत नात. गुन्यांवगारी दर बरोच वाडला आनी हाका जापसलादर भाजप सरकारच आसा.
सरकार गोंयचें चितपाचें सोडून फक्त गोंयाकारा मदीं फुट घालून एकचार कसो इबाडचो हाचेर चड लक्ष दिता. गुन्यांवकारांक जो भंय आसपाक जाय तो दिसना. येता ते विधानसभेच्या वेचणुकेंत भाजपाक धडो शिकोवपाक जाय, असो उलो वळवयकार हांणी मारला.
२०२४ वर्सा राज्यांत २७४ किलोचे आनी ९ कोटी मोलाचीं घुवळें वखदां जप्त केल्लीं. मात जानेवारी ते जुन २०२५ मजगतीं १५० किलो आनी ६८-७३ कोटी मोलाचीं घुवळे वखदां जप्त केल्यांत. घुवळे वखदांचेर निंयत्रण खंय आसा? हातूंत भ्रष्टाचार गुंतिल्ल्याचें सिद्द जाता, असो दावो गोंय प्रदेश युवा कॉंग्रेशीचे अध्यक्ष महेश नदार हांणी केलो.
२०२४ वर्सा १०६ बलात्कार जाल्ले जाल्यार जानवेरी ते जून २०२५ मजगतीं ५४ बलात्कार नोंद जाल्यात. २०२३ सात २८८ बायलां आड अत्याचारांची नोंद जाल्ली आनी २०२४ वर्सा ३६५ घडणुकांची नोंद जाल्या. २०२५ आनी २०२४ जानेवारी ते जून मजगतीं तुळा केल्ल्या बायलां आड अत्याचार ९० टक्के वाडल्या. हे कमी करपाक सरकार कांयच करिना, असो आरोप नदार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
