पुसापती अशोक गजपती राजू २६ तारखेर गोंयचो राज्यपाल म्हूण सोपूत घेतले

भांगरभूंय | प्रतिनिधी

पणजी : आदले केंद्रीय मंत्री पुसापती अशोक गजपती राजू हे २६ जुलयाक राज्यपाल म्हणून रुजू जातले. राजभवनाचेर २६ जुलयाक सकाळीं ११ वरांचेर ते सोपूत विधी घेतले. मुंबय उच्च न्यायालयाचे मुखेल न्यायमुर्ती अलोक आराधे हे तांकां राज्यपालपदाचो सोपूत दितले.
राज्यपाल पी. एस. श्रीधरन पिल्लई हांचे सुवातेर गजपती राजू हांची राज्यपालपदा नेमणूक करपाचो आदेश राष्ट्रपतींनी १४ जुलयाक जारी केल्लो. मुख्यमंत्री डॉ. प्रमोद सावंत हांचे सयत हेर मंत्री आनी विरोधी पक्ष फुडारी युरी आलेमाव हांणी राजू हांचे नियुक्तीक येवकार दिल्लो.
आंध्र प्रदेश विधानसभेंत २५ वर्सां परस चड काळ आमदार असलेले पुसापती अशोक गजपती राजू हे २०१४ ते २०१८ मेरेन केंद्रीय मंत्री आशिल्ले. तेलगू देसम तशेंच भारतीय जनता पक्षा खातीर तांणी जायतीं वर्सां काम केलां.
पिल्लई हांणी गोंयचे १९ वे राज्यपाल म्हणून १५ जुलय २०२१ दिसा सोपूत घेतिल्लो. गोंयचे राज्यपाल म्हणून चार वर्सांचो कार्यकाळ तांणी पुराय केलो.