भांगरभूंय | प्रतिनिधी
दोडामार्ग : सध्या मायणा-कुडटरी रावपी आनी मूळ शिरंगे बोडण- दोडामार्गचे अभिमन्यू अर्जुन नायक हे आपल्या ११ वर्सां पिरायेचो पूत आकाश हाका घेवन चार दिसां आदीं दोडामार्ग वचपाक भायर सरिल्ले. मात ते दोगूय आजूनय घरा पावूंक नात. ह्या प्रकरणांत अभिमन्यू हांची बायल अनुष्का हांणी कुडटरे पुलिशेंत कागाळ केल्या. ती आतां दोडामार्ग पुलीस स्टेशनांत वर्ग केल्या.
अनुष्का हांणी पुलिसांक दिल्ले म्हायती प्रमाण, ती कांय कामा खातीर वास्को भयणी कडेन गेल्ली. थंयच्यान परतल्या उपरांत घोव अभिमन्यू आनी व्हडलो पूत आकाश घरा नाशिल्ल्याचें तिच्या लक्षांत आयलें. तिणें आपल्या घोवाक फोन केलो. मात संपर्क जावंक़ ना. सोयरीं, वळखीच्या मनशां कडेन तिणें चवकशी केली. मात खंयच कसलीच म्हायती मेळूंक ना.
मेळिल्ले म्हायती प्रमाण, अभिमन्यू हे गोंयच्यान आपल्या मूळ गांवांत शिरंगे बोडण हांगा गेल्ले. मात ते थंय पावूंक नात. तांच्या मोबायलाचें निमाणें लोकेशन दोडामार्ग म्हालांतल्या तेरवण गांवांत दिसलां. त्या भागांत पुलिसांनी तांचो सोद घेतलो, मात कांयच हाताक लागूंक ना.
वयर दिल्ल्या फोटवांतलो अभिमन्यू अर्जुन नायक आनी ताचो पूत आकाश दिसल्यार कुडटरी वा दोडामार्ग पुलीस स्टेशनांत संपर्क करचो, असो उलो पुलिसांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
