भांगरभूंय | प्रतिनिधी
पणजीः नव्या रेंट-अ-कॅब मोटारींक हाचे मुखार परमीट परवानो मेळचो ना. रस्तो सुरक्षा, रस्त्यार जावपी येरादारीची गर्दी हांचो विचार करून गोंयांत रेंट-अ-कॅबाक परवाने दिवचो न्हय असो आदेश सरकारन राज्य येरादारी प्राधिकरणाला दिला.
गोंयांत बेशिस्तीन रेंट-अ-कॅब चलोवपी पर्यटकांक लागून अपघातांनी वाड जायत आशिल्ल्याच्यो कितल्योशोच कागाळी आयल्यात. ते भायर कांय उपद्रवी पर्यटक मोटारीचेर बसून मस्ती करताले, तशेच कांय सोरो पियेवन मोटारी गतीन आनी कश्याय कश्यो चलयताले. रेंट-अ-कॅबांक लागून कितलेशेच अपघात जावन स्कुटरी वा चलून वचपी लोकांचो अपघात जावन तांचो जीव लेगीत गेला. देखून रेंट-अ-कॅब वाहनांचेर नियंत्रण येवचें अशी मागणी जाल्ली.
हे विशीं येरादारी खात्यान 24 फेब्रुवारीक बसका घेवन वाडटे अपघात आनी सोरो पियेवन गाडी चलोवपाचे फाटभुंयेर रेंट अ कॅबांक नवे परवाने दिवप बंद करपाचो निर्णय घेतिल्लो. देखून रेंट-अ-कॅबा खातीर नवे अर्ज दाखल करचे न्हय आनी जर आयल्यार ताचेर कसलीच प्रक्रिया जावची ना अशें येरादारी संचालकान सांगिल्लें.
पूण कांय रेंट-अ-कॅब धनयांनी हाका विरोध करून हे विशीं मुख्यमंत्री डॉ. प्रमोद सावंत हांची भेट घेतिल्ली. वाडट्या अपघातांचें कारण सांगून मुख्यमंत्री रेंट-अ-कॅबांक नवे परवाने दिवपा आड आशिल्ले. पूण हे विशींचो नियाळ घेतले अशें तांणी रेंट-अ-कॅब धनयांक सांगिल्लें.
बिरेस्तारा येरादारी संचालनालयान हे विशींची अधिसुचोवणी उजवाडांक हाडून नव्या रेंट-अ-कॅबा खातीर नवे परवाने दिवपाचेर बंदी लागू केली.
रस्त्यार घुट्टी जावपाचो प्रकार बंद जावचो आनी रस्तो सुरक्षेचे नदरेन गोंय सरकारान राज्य येरादारी प्राधिकरणाक निदेश दिल्यात की तांचे रेंट-अ-कॅब येवजण 1989 खाला लिसेन्स वा परवाने दिवचे न्हय. ह्या आदेशाची अंमलबजावणी 24 फेब्रुवारी 2025 सावन करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
