भांगरभूंय | प्रतिनिधी
मीराबाई चानून भारताक राष्ट्रकूल खेळां सर्त 2022तलें पयलें भांगरा पदक जिखून दिलें. मीराबाई चानून बायलांच्या 49 कील वजन गटांत हें पदक जिखलें.
स्नॅचांत चानून पयल्या यत्नांत 88 कील आनी क्लीन अॅण्ड जर्कांत 113 कील वजन उखलून भांगरा पदक जिखपा खेरीत खेळांतलो विक्रम लेगीत केलो. तिणें राष्ट्रकूल आनी स्नॅचांत हो विक्रम केलो. तिणें क्लीन अॅण्ड जर्कांत पयल्या यत्नांत 109, दुसऱ्या यत्नांत 113 कील वजन उखल्लें.
अशे तरेन भारतान दुसऱ्या दिसा वट्ट तीन पदकां जिखलीं. ही तिनूय पदकां वेटलिफ्टिंगेंत फावो जालीं.
मजगतीं, चानू पयलीं सर्तीच्या दुसऱ्या दिसा पयलें पदक वेटलिफ्टर संकेत सरगरान मेळोवन दिल्लें. ताणें 55 कील वजन गटांत वट्ट 248 कील वजन उखलून रुप्या पदक जिखलें. भारताचें अंदूंचे राष्ट्रकूल खेळां सर्तींतलें पयलें पदक थारलें.
जाल्यार दुसरें पदक वेटलिफ्टर गुरुराज पुजारीन मेळोवन दिलें. ताणें 61 कील वनज गटांत तिसरी सुवात मेळयत कांश्या पदक जोडलें.
संकेतान स्नॅच प्रकारांत 113 जाल्यार क्लीन अॅण्ड जर्कांत 135 कील वजन उखल्लें. संकेताक 139 कील वजन उखलतना दुखापत जावन लेगीत 141 कील वजन उखलपाचो यत्न केलो. पूण, ताचो हो यत्न फसलो. क्लीन अॅण्ड जर्कांत ताचे दोन यत्न फुकट गेले आसले तरी तो वट्ट 248 कील वजन उखलून भांगरा पदकाचे सर्तींत आशिल्लो. पूण अखेरच्या खिणाक मलेशियाच्या मोहम्मद अनिकान संकेता परस फक्त एक कील वजन चल उखलून भांगरा पदक जिखलें.
संकेताक क्लीन अॅण्ड जर्क प्रकारांत पयल्या यत्नांत 135 कील वजन उखलपाक अपेस आयिल्लें. पूण, दुसऱ्या यत्नांत येसस्वी रितीन 135 कील वजन उखलून ताणें नेटान पुनरागमन केलें. वट्ट 248 कील वजन उखलून ताणें परतून एकदां भांगरा पदकाचे रेसींत आघाडी घेतली. तिसऱ्या यत्नांत मात ताचो 139 कील वजन उखलपाचो यत्न फसलो. ताच्या हाताक दुखापत लेगीत जाली.
मजगतीं, गुरुराज पुजारीन भारताक दुसरें पदक मेळोवन दिलें. भांगरा पदक मलेशियाच्या मोहम्मद अंजील हाणें मेळयलें. जाल्यार रुप्या पदक न्यू गिनीच्या मोरे बेयून जोडलें. पुजारीन फक्त 269 कील वजन उखलून पदक जिखलें. स्नॅचांत 118 कील आनी क्लीन अॅण्ड जर्कांत 151 कील वजन उखल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
