भांगरभूंय | प्रतिनिधी
मडगांव : दुर्गा चिंचणीच्या आशिकुशीक आशिल्ले लोकवस्तींलें एक बंद घर दोगां चोरांनी फोडपाचो यत्न बुधवारा दनपरां केलो. शेजार्यांनी कळयतकच दोगांकूय पंच जेरसन गोम्स हांणी धरले. उपरांत त्या दोगांय चोरांनी ताचेर हॅल्मेटान हल्लो करून थंयच्यान पळ काडलो. कुंकळी पुलीस हे विशीं फुडलो तपास करतात.
अनवळखी मनीस बंद घरांत येतना दिशिल्ल्यान शेजारचे एके बायलेन तांकां विचारलें, तेन्ना त्या दोगांयनी राखणे वणटीवेल्यान उडी मारली. ते बायलेन ही गजाल थंयचे पंच जेर्सन गोम्स हांकां सांगली. तेन्ना गोम्स हांणी वांगडा आनीक एकल्याक घेवन चोर गेल्ले वटेन धांव घेतली. चोरांक धरपाक जेर्सन आनी ताचे वांगडा आयिल्लो मनीस वेगवेगळ्या वटांनी वतना, जेर्सन हांकां सुमार १२ वर्सां पिरायेच्या एका भुरग्या वांगडा एक तरणाटो बजाज पल्सर गाडी धुकलीत व्हरतना दिसलो. तांणीच चोरी करपाचो यत्न केल्ल्याचें समजतांच जेर्सन गोम्स हांणी तांकां ‘गाडी बंद पडली?’ अशें विचारलें आनी त्या भुरग्याक घट्ट धरलो. इतल्यान त्या तरणाट्यान जेर्सन हाका नेटान धुकल्लो आनी त्या भुरग्यान जेर्सनाचे तकलेर नेटान हॅल्मेट मारलें. हातूंत जेरसन बेशुद्ध पडलो. लागींच काम करपी एका कामगारान तांचे वटेन धांव घेतांच ते चोर थंयच्यान पळून गेले. हॉस्पिटलांत उपचार केले उपरांत सध्या पंच जेर्सन हांची भलायकी सुदारल्या.
कुंकळ्ळी पुलिसांनीय हे विशीं म्हायती घेतली. चोरांचें हॅल्मेट सांपडिल्ल्यान गांवांत बसयिल्ल्या सीसीटीव्ही कॅमेर्यांतल्यान सध्या दोगूय दुबावीत चोरां विशींचे पुरावे पुलिसांक सांपडल्यात. हे विशीं पुलीस निरीक्षक डायगो ग्रॅसिअस हांच्या मार्गदर्शना खाला फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
