भांगरभूंय | प्रतिनिधी
पेडणें: कोंकणी भाशे वांगडाच मराठी भाशेक राजभाशेचो दर्जो दिवपाक कायद्यांत दुरुस्ती करपाची मागणी करपाचें निवेदन येवपी विधानसभा अधिवेशनांत मांडपाक मांद्रेंचे आमदार जीत आरोलकार हांकां सादर केलें.
ह्या वेळार राजभास निर्धार समितीचे निवृत्त प्राचार्य गजानन मांद्रेंकार, मांद्रे प्रखंडाचे अध्यक्ष सुभाष शेटगांवकार, वांगडी स्वरूप नायक, राया नायक आनी तेजल नायक आनी हेर हजर आशिल्ले.
आमदार आरोलकार हांणी सांगलें, उत्तर गोंयांत पुरायेन मराठी भाशेचो शेक आसा. कोंकणी आनी मराठी ह्यो दोनूय भाशा म्हाका जाय. कोंकणी वांगडा मराठी भाशेकूय राजभाशेचो दर्जो मेळपाक जाय. हाका लागून आपूण विधानसभा अधिवेशनांत झिरो अवराक हो विशय हाडपाचो यत्न करतलों अशें आस्वासन तांणी दिलें.
प्राचार्य मांद्रेंकार हांणी सांगलें, राज्यांत मराठींतल्यान विवीध सांस्कृतीक कार्यावळीं वांगडाच भजन, आरती जातात. ताचो विचार करून भाजपा सरकारान मराठीक राजभाशेचो दर्जो दिवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
