भांगरभूंय | प्रतिनिधी
पणजी : फाटल्या कांय म्हयन्यांत गोंया सयत पुराय देशांत शॅर बाजारांतली गुंतवणूक उणी जाल्ली. मात फेब्रुवारी उपरांत गुंतवणुकेंत परतून वाड जातना दिसता. फाटल्या पांच म्हयन्यांत गोंयकारांचे म्युच्युअल फंड गुंतवणुकेंत वाड जाल्या. फेब्रुवारी 2025 चे निमाणे मेरेन गोंयांतल्यान म्युच्युअल फंडांत 36 हजार 300 कोटीं रुपया गुंतयल्ले. जून 2025 चे निमाणे मेरेन तातूंत 1,300 कोटी रुपयांची वाड जावन ती 39 हजार 900 कोटी रुपया जाल्या. असोसिएशन ऑफ म्युच्युअल फंड इन इंडिया (एएमएफएय) हे संस्थेच्या अहवाला प्रमाण ही म्हायती मेळ्ळ्या.
अहवाला प्रमाण गोंयांतल्या म्युच्युअल फंडांतली दर व्यक्ती गुंतवणूक लेगीत वाडल्या. फेब्रुवारी 2025 चे निमाणे मेरेन गोंयांत दर व्यक्ती 2 लाख 33 हजार 90 रुपया म्युच्युअल फंडांत गुंतयल्ले. जून 2025 चे निमाणे मेरेन वाड जावन ती दर व्यक्ती 2 लाख 56 हजार 170 रुपया जाल्या. गोंयांतली दर व्यक्ती गुंतवणूक ही देशांत सगल्यांत चड आसा. हे वळेरेंत महाराष्ट्र दुसऱ्या नंबराचेर आसा. थंयच्यान दर व्यक्ती 2 लाख 44 हजार 110 रुपया म्युच्युअल फंडांत गुंतयल्यात. केद्रशासीत प्रदेशांत दिल्लीची दरेक व्यक्ती म्युच्युअल गुंतवणूक 2 लाख 95 हजार 840 रुपया आसा. राष्ट्रीय शॅर बाजाराच्या अहवाला प्रमाण अर्थीक वर्स 2025-26 त मे 2025 च्या निमाणे मेरेन गोंयांतल्या बायलां गुंतवणूकदारांचे टक्केवारींत परतून वाड जाल्या. गोंयांतल्या शॅर बाजारांतल्या वट्ट गुंतवणूकदारां मदले 32.6 टक्के गुंतवणूकदार बायलां आशिल्लीं. बायलां गुंतवणूकदारांची राष्ट्रीय सरासरी 24.4 टक्के आसा. अर्थीक वर्स 2022-23 त गोंयांतल्या बायलां गुंतवणूकदारांची टक्केवारी 30.2 टक्के आशिल्ली. गोंया उपरांत सिक्कीम, मिझोरमांत लेगीत बायलां गुंतवणूकदारांची टक्केवारी चड आसा.
गुंतवणूकदारांचे संख्येंत वाड
राष्ट्रीय शॅर बाजाराच्या अहवाला प्रमाण ऑक्टोबर 2024 च्या निमाणे मेरेन गोंयांतल्या 2.33 लाख लोकांनी शॅर बाजारांत गुंतवणूक केल्ली. मे 2025 निमाणे मेरेन वाडून ती 2.54 लाख जाल्या. मे निमाणे मेरेन देशभरांतल्या 11.49 कोटी लोकांनी शॅर बाजारांत गुंतवणूक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
