रस्ताद सुण्यांक खावपाक घालप्यांचेर सुप्रीम कोर्ट तिडकलो
भांगरभूंय | प्रतिनिधी
नवी दिल्ली, खबरां संस्था: रस्ताद सुण्यांक उक्त्यार खावपाक घालपा विशीं सर्वोच्च न्यायालयान एक म्हत्वाचें निरिक्षण नोंद केलें. सर्वोच्च न्यायालयान अशे तरेन उक्त्यार सुण्यांक खावपाक घालपाचे तिडक उक्तायल्या. उत्तर प्रदेशांतल्या नोएडाचे सोसायटींत सुण्यांक खावपाक घालपा खातीर योग्य वेवस्था करपाची मागणी करपी याचिकादारांक न्यायालयान तिडक उक्तायली. ’तुमी तुमच्या घरांनी एक आसरो घर उबारचें आनी थंय सुण्यांक खावपाक घालचें.’ अशें सर्वोच्च न्यायालयान म्हणलां.
कोणाच्या मुखार जाली ही सुनावणी?
न्यायाधीश विक्रम नाथ आनी न्यायमूर्ती संदीप मेहता हांच्या खंडपिठा मुखार ही सुनावणी जाली. सुनावणी वेळार खंडपिठान जनावर मोगीं विशीं उलयतना एक व्यंग्यात्मक विधान केलें, ‘‘ह्या व्हड काळजाच्या लोकांक दरेक लेन, दरेक रस्तो कित्याक उगडचो न्हय? जंय फकत जनावरांक परवानगी आसा थंय मनशांक सुवात ना.’’ जनावर मोगींचेर आनीक प्रस्न विचारतना सर्वोच्च न्यायालयान म्हणलें, ‘‘तुमी तुमच्या घरांत ह्या सुण्यांक कित्याक जेवण घालिनात? तुमकां हें करपाक कोणूच आडायना.’’अशें तांणी म्हणलें.
याचिकाकर्त्याचें म्हणणें कितें?
ह्या प्रकरणांत, याचिकाकर्त्यांनी म्हणलें, सुण्यांक खावपाक घालतना तिका त्रास जातालो. समाजांतल्या जनावरांच्या जल्म नियंत्रण नेमां प्रमाण, सुण्यांक खावपाक घालपा खातीर एक निश्चीत सुवात आसची. खरें म्हय्यार जनावरां जल्म नियंत्रण नेमांचो नियम क्रमांक २० हो रस्ताद सुण्यांक खावपाक दिवपा कडेन संबंदीत आसा. हातूंत अशें म्हणलां, तांच्या वाठारांत रावपी रस्ताद सुण्यांक जेवदिवपाची गरजेची वेवस्था करप ही रहिवासी कल्याण संघटणा, अपार्टमेंट धनी संघटणा वा थळावे संस्थेच्या प्रतिनिधींची जापसालदारकी आसा.
वकीलान कितें म्हणलें?
वकीलाचे वतीन असो युक्तिवाद केलो की ही वेवस्था ग्रेटर नोएडांत नगरपालिकेन केल्या. मात नोएडांत ना. जंय लोक भेट दिनात अशा सुवातांचेरूय जेवणाची पुरवण करपाक नियुक्त करपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
