भांगरभूंय | प्रतिनिधी
बंगळुरु, खबरां संस्था: कर्नाटक सरकारान सिनेमा मोगीं खातीर म्हत्वाचो निर्णय घेतला. मल्टिप्लेक्स आनी सिंगल स्क्रीन थेटरां खातीर तिकेटीचें चडांत चड मोल 200 रुपया इतली निश्चीत केलां. हो निर्णय कन्नड सिनेमाांक गर्दी जावची आनी प्रेक्षकांक समाधानी करपा खातीर घेतला. दक्षीण भारतांतल्या जायत्या राज्यांनी पयलींच सिनेमा तिकेटींच्या चडांत चड दरा खातीर मर्यादा घालून दिल्या. जातूंत तामिळनाडू, आंध्र प्रदेश आनी तेलंगण ह्या राज्यांत आदीं सावनूच सिनेमांचे तिकेटी संबंदी दरांत अशे नेम लागू केल्यात. मजगतीं, अशांतूच कर्नाटक सरकारान लागू केल्ल्या 200 रुपयांचो समान दराचो नेम प्रेक्षकां खातीर म्हत्वाचो थारता.
बेंगळुरूंत मंगळारा रातीं सरकारान ह्या निर्णया विशीं घोशणा केली. आतां खंयच्याय थेटरांत सिनेमांची तिकेट 200 रुपयां परस चड आसची ना. ही मर्यादा करां सयत लागू केल्या. कर्नाटकाचे मुख्यमंत्री सिद्धरामय्या हांणी अंदूंच्या अर्थसंकल्पीय भाशणांत हें आस्वासन दिल्लें. ह्या निर्णयाचो फायदो आतां सिनेमा मोगींक जातलो. जायते सिनेमामोगी तिकेटीचें मोल पळोवन सिनेमा पळोवपाक येनात. हाचे पयलीं तिकेट पांचशें ते हजार रुपयां मेरेन आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
