भांगरभूंय | प्रतिनिधी
खबरां संस्था
लंडन : भारतान लॉर्ड्स टॅस्ट व्हगडायली. भारतान ह्या टॅस्टींत निमाणे मेरेन झूज दिली. मात, बशीराच्या जादुई बॉलाचेर सिराज बाद जालो आनी भारताचो संघर्श सोंपलो. मॅच सोंपताच आनी मॅच सुरू आसतनाय भारताचो अश्टतासी खेळगडो रवींद्र जडेजा, फास्ट बॉलर जसप्रीत बुमरा आनी मोहम्मद सिराज हांची खूब तोखणाय जाली. मात, कांय आदल्या क्रिकेटरांनी ह्या तिघांचेर आरोप करपाक सुरवात केल्या. ताचे हेर आदल्या क्रिकेटरांनीय जाप दिल्या.
भारताचो आदलो कॅप्टन सुनील गावस्करान जडेजान मॅच सोंपोवपाक जाय आशिल्ली. ताणें आक्रमक खेळ केल्लो जाल्यार एकवेळ भारत जिखता आशिल्लो, अशें ताणें म्हणलां.
ज्यो रूट आनी बशीर जेन्ना बॉलिंगेक आयिल्लें, तेन्ना जडेजान वेगान खेळून सादोवन घेवपाक जाय आशिल्लें. ताणें हवेंत खेळपाक जाय आशिल्लें अशें म्हणीना, पूण ताणें मॅच हातांत घेवपाक जाय आशिल्ली, अशें गावस्कर उलयलो.
भारताची स्थिती सामकीच बाबत जाल्ली तेन्ना जडेजान मैदानार नांगर घालून 181 बॉलांत नाबाद 61 धांवड्यो काडल्यो. दुसरे वटेन मोहम्मद सिराजान 30 बॉलांत 4 आनी जसप्रीत बुमरान 53 बॉलांत 5 धांवड्यो काडल्यो. बशीराच्या ओव्हरींत सिराजान बॉल वेवस्थीत खेळ्ळो, बॅटाच्या मदीं बॉल लागलो, मात तो बॉल फुड्यान पडून फाटल्यान विकेटी वटेन स्पीन जावन गेलो आनी विकेटीक लागना फुडें बॅल्स पडलीं आनी भारताची हार जाली.
ह्या सगल्या प्रकाराक गावस्करान जडेजाक जापसालदार धरला. ताणें पयलींच आक्रमण केल्लें जाल्यार मॅच भारत जिखता आशिल्लो, अशें तो म्हणटा.
भारताचो आदलो स्पिनर अनिल कुंबळेनूय सुनील गावस्करा भशेनूच मत उक्तायलें. जडेजान वोक्स आनी स्पिनरां आड आक्रमक खेळपाक जाय आशिल्ले, अशें तो म्हणटा. ताणें हिशेब करून जोखीम घेवपाक जाय आशिल्ली. अशें केल्ले जाल्या भारत लक्ष्या लागीं पावतलो आशिल्लो, अशेंय कुंबळेन म्हणलें.
जडेजाचो आदलो वांगडा भारताचो आदलो स्पिनर रविचंद्रन आश्विनान जडेजाक तेंको दिलो. जडेजा खुबूच बरो खेळ्ळो. मॅच भायल्यान दिसता तितली सोंपी नासता. मैदानाचेर शिमे लागी फिल्डर आशिल्ले. सरळ शिमारेशा खूब लांब आशिल्ली, तशेंच बॉल धांवय नाशिल्लो. तेन्ना फकत सके मारपाक वचपाचें? असो ताणें प्रस्न केलो. रिव्हर्स स्वीप आनी स्कूप हें दोनूय पर्याय उरताले, मात तें पर्याय घेवप म्हणल्यार केन्नाय घात जावं येतालो, अशेंय ताणें म्हणलें.
जडेजा परस स्पिनरांक सिराज बरे तरेन खेळपाक शकतालो, ताणें मदीं एक दोनदा जाता जाल्यार आक्रमक बॅटींग करून पळोवपाक जाय आशिल्ली, अशें आश्विन उलयलो.
दक्षीण आफ्रिकेचो आदलो क्रिकेटर हर्षल गिब्सान जसप्रीत बुमराक वडीर काडलो. टॅस्ट क्रिकेटींत एका ओव्हरींत सगल्यांत चड 35 धांवड्यो काडपाचो विक्रम नांवांर आशिल्ल्या जसप्रीत बुमरान जोश दाखयलोच ना म्हूण तो उलयलो. रवींद्र जडेजा बरोबर ताणें भागिदारी केली. मात, जिखपा खातीरचो जोश ताणें दाखयलोच ना, असो आरोप गिब्सान केलो. तो ज्या बॉलाचेर बाद जाला, तो बॉल वेवस्थीत खेळिल्लो जाल्यार सको वचपाचो, मात, ताणें तसो खेळ केलोच ना म्हूण गिब्सान नमूद केलें.
बुमरा 62वे ओव्हरींत बेन स्टोक्साच्या बॉलार पूल शॉट मारपाच्या बोवाळांत बाद जाल्लो.
डॉसन इंग्लंडाच्या ताफ्यांत
ओल्ड ट्रॅफर्डांत जावपी चवथ्या टॅस्टी खातीर इंग्लंडान लियाम डॉसनाक पंगडांत घेतलो. शोएब बशीराच्या बोटाक दुखापत जाल्ल्यान डॉसनाक संद दिल्या. 35 वर्सांच्या डॉसनान इंग्लंडा खातीर जुलय 2017त निमाणी टॅस्ट खेळिल्ली.
मजगतीं, इंग्लंडान सॅम कूक आनी जॅमी ओव्हरटनाक कावंटी क्रिकेट खेळपा खातीर मुक्त केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
