रो रो फेरीचो पयलो दीस गेलो कोंफुसावांत

भांगरभूंय | प्रतिनिधी

हिसपा भायर गर्देक लागून फेरीत बोवाळ

पणजीः रो रो फेरीचो पयलो दीस कोंफुसावांत सांपडलो. रायबंदर धक्यार येरादारीची संख्या वाडिल्ल्या कारणान रो रो फेरीच्या प्रवाशांक येरादारीचेर नियंत्रण मेळोवपाक कठीण जावन स्थिती नियंत्रणा भायर गेली. जर स्थिती सारखीच नियंत्रणा भायर वता जाल्यार आमच्यो पाेरण्योच फेरीबोटी तैनात करतले अशें न्हंय येरादारी खात्याच्या वरिश्ठ अधिकाऱ्यान सांगलें.

सोमारा सकाळीं मुख्यमंत्री डॉ. प्रमोद सावंत हांचे हस्तुकीं चोडण- रायबंदर दोन रो रो फेरीचें उक्तावण जालें. एका फेरीबोटींत 15 मोटारी, 40 स्कुटरी आनी 100 प्रवाशी एकाच वांगडा घेवन वचपाची तांक आसा. ही फेरी रायबंदर ते चोडण हें अंतर सात ते आठ मिणटां भितर पुराय करतली. देखून फेरीबोटीची वाट पळोवपाचे आनी तातूंत प्रवास करपाचो वेळ 12 मिणटां परस चड आसचो ना. चार फेरीबोटीची तांक दोन रो रो बोटींत आसा अशी म्हायती न्हंय येरादारी मंत्री सुभाष फळदेसाय हांणी दिल्ली.

पूण ज्यो सदच्यो सादारण फेरी काम करतात तें काम रो रो फेरी करपाक शकल्यो नात. तें म्हळ्यार गर्दीचें नियंत्रण.

सकाळीं हो लोकांचो कामांक वचपाचो दीस. आनी रायबंद- चोडण मार्गार येरादीर करप्यांची हिसपा भायर गर्दी आसता. पूण रो रो फेरीबोट नवी आशिल्ल्या कारणान आनी काम करपी कर्मचारी नवे आशिल्ल्या कारणान तांकां हे गर्दीचे अणभव नाशिल्लो. हे फेरीबोटींत घुट्टी जावन परिस्थिती हाता भायर गेली आनी कर्मचाऱ्यांचे बारा बिरेस्तार जाले.

ही रो रो फेरी विजय मरीन सर्वीस हांका पीपीपी तत्वाचेर चलोवपाक दिल्या. हे कर्मचारी विजय मरीन सर्वीसचे आसात आनी तांकां गर्दी हाताळपाचो अणभव ना. आमचे सादारण फेरीबोटीचे कर्मचारी काय न्हय कशी गर्दी हातळटात. तशेंच रायबंदर- चोडण मार्गय तांकां नवो आसा देखून तितली म्हायती ह्या मार्गा विशीं खबर ना, अशी म्हायती अधिकाऱ्यान दिली.

सकाळ फुडे फेरी धक्यार वाहनांची गर्दी जावन फेरी धक्यार बोवाळ जालो. तांकां दोन दीस मातशे पासियेंस काडून ह्यो फेरीबोटी ल्हवू ल्हवू चलयात अशें सांगलां. जर सांजे वेळार गर्दी जावन स्थिती हाताभायर वता जाल्यार खात्याच्यो तीन सादारण फेरी आमी सुवातेर तैनात करतले, अशें अधिकाऱ्यान सांगलें.