भांगरभूंय | प्रतिनिधी
लग्नाच्यो गांठी सर्गांत बांदतात अशें म्हणटात. पयलीं ह्यो गांठी घट्ट बांदताले. कारण ह्यो गांठी आयुश्यभर तुटनाशिल्ल्यो. इतलेंच न्हय तर होच सांगाती फुडल्या सात जल्मांत मेळूं अशी प्रार्थना घोव-बायल आनी देवा कडेन करतालीं. हालीं मात ह्यो लग्नाच्यो गांठी सदळ बांदतात काय कितें असो दुबाव येवंक लागला. कारण आयुश्यभर सोडाच पूण कांय वर्सां लेगीत लग्न जाल्लें जोडपें एकठांय रावपाक तयार ना. लग्ना उपरांत अवघ्या कांय वर्सांनी घोव-बायले मदीं वाद जाता आनी हो वाद थेट घटस्फोटा मेरेन पावता.
आयज देशांतल्या न्यायालयांनी घटस्फोटाच्यो लाखांनी याचिका प्रलंबीत आसात. दीसपट्टे तातूंत भर पडत आसा. घटस्फोटाची नवी याचिका दाखल जाली ना असो एकूय दीस उजवाडना. घटस्फोटाचे लाखांनी खटले प्रलंबीत आशिल्ल्यान स म्हयन्यां भितर घटस्फोटाचो निकाल दिवचो असो निर्णय न्यायालयान घेतला. घटस्फोटाचे खटले ताकतिकेन निकालांत काडीत आसले तरी तातूंत नव्यान भर पडत आशिल्ल्यान न्यायालयां हतबल जाल्यांत.
वास्तवीक दोन दसकां पयलीं घटस्फोटाचें प्रकरण नगण्य स्वरुपांत आशिल्लें. निमाणचो पर्याय म्हूण घटस्फोटा कडेन पळयताले. आयज मात सामक्या साद्या शुल्लक कारणा वेल्यान लेगीत घटस्फोट मागतात. आयज न्यायालयांत दाखल जावपी घटस्फोटाचीं कारणां पळयत जाल्यार तुमी घुंवळ येवन पडटले. बायलेक साडी न्हेसूंक येना, बायलेन रांदिल्लें सारकें आसना, ताका रूच आसना, बायल सेगीत टीव्ही आनी मोबायलाचेर आसता. बायल आपलो मान राखिना. बायलेक फेसबुका वेलें रील पळोवपाचें पिशें, बायल रातची लेट न्हिदता आनी सकाळीं बेगीन उठना. ह्या हांसपाक येवपा सारक्या आनी मनाक पटनाशिल्ल्या कारणांनी घटस्फोट मागतात.
बायले कडल्यान घटस्फोटाची अशींच कितें तरी कारणां दितात. घोव आपल्याक वेळ दिना. घोव फक्त आपल्या आवय-बापायचें आयकता. घोव आपल्याक भोंवपाक व्हरना. घोव आपल्या मना सारको वागना अशी हांसपाक येवपा सारकीं कारणां दिवन घटस्फोटाची मागणी करतात.
घटस्फोटाची ही किरकोळ कारणां जितलीं सादीं आनी हांसूंक येवपा सारकीं दिसतात तितलींच हुस्क्याचीं लेगीत आसात. कारण अशा किरकोळ कारणांनी जर घटस्फोट जावंक लागले जाल्यार लग्न संस्थाच घाताक येतल्यो. तशेंच घोव मारपेट करता, असैमीक संबंदांची मागणी करता. बायल परती जाप दिता, घोव म्हूण मान दिना अशा कारणांनी लेगीत घटस्फोटाची मागणी करतात. अशी आनी हाचे परसय खूबशीं वेगळीं वेगळीं कारणां घटस्फोटा खातीर दितात. अर्थांत सगल्या कारणांचो अभ्यास करूनच न्यायालय घटस्फोटाचो निकाल दिता.
म्हणल्यार अशा किरकोळ कारणां खातीर घटस्फोटाची मागणी करप कितले मेरेन योग्य आसा हाचो विचार दोगांनीय करूंक जाय. नातें कसलेंय आसूं तातूंत राग, रुसप आसताच. संवसार म्हणलो की आयदनाक आयदन लागताच. जर दोगांय मदीं वाद जालो जाल्यार दोगां मदल्यान एकल्यान शांत रावचें. थोड्या वेळान तिडक न्हिवता आनी वादूय सोंपता. पूण उतराक उतर दिलें की वाद वाडटा आनी वादाचें रुपांतर व्हड झगड्यांत जाता. तातूंत दोनूय वटानच्या नात्याक कोण ना कोण तरी फोण्ण मारपी आसताच. अशे फोण्ण मारपी मनीस आयल्यार हो वाद सरळ न्यायालयांत पावता. सामक्या शुल्लक कारणाक लागूनय नातें तुटपाक फावोशें थारत आशिल्ल्यान नात्याची गुंफण घालतना मात्शें सांवरुनच वागचें पडटा. म्हजेंच चुकलें हें मनान मान्य करचें पडटा. जाल्यारूच नातें तिगून उरता आनी तातूंतय गोडसाण उरता.
सगल्यांत म्हत्वाचो आसता तो विस्वास. जर विस्वासाक वेंर वचत जाल्यार नात्यांत वितुश्ट येताच. म्हणून घोव-बायले मदीं विस्वास खूब म्हत्वाचो आसा. विस्वासाक वेंर वच्ची न्हय हाची जापसालदारकी दोगांचीय आसता. नात्यांत दुरावो जावपाचें आनीक एक म्हत्वाचें कारण म्हणल्यार घोव-बायले मदीं आशिल्लो अहंकार. अहंकाराक लागूनच नातीं तुट्टात. म्हणून दोगांनीय अहंकार पयस दवरूंक जाय. अहंकार पयस दवरून एकामेकां वेलो विस्वास कायम दवरीत जाल्यार न्यात्यांत दुरावो निर्माण जावचो ना आनी घटस्फोटाचेंय प्रमाण उणें जातलें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
