भांगरभूंय | प्रतिनिधी
कॅलिफॉर्निया, खबरां संस्था : वट्ट १८ दिसांच्या अंतराळ प्रवासा उपरांत शुभांशू शुक्ला धर्तरेर परतले. पुराय देश ताची वाट पळयतालो. ग्रुप कॅप्टन शुभांशू शुक्ला हांचें अंतराळयान ’ग्रेस’ कॅप्सूल अमेरिकेच्या प्रशांत महासागरांत देंवलें. ते धर्तरेर परततांच भारतांत उमेदीचें ल्हार पातळ्ळें. तांचे आवयन सुटकेचो स्वास घेतलो.
शुभांशू ७ दीस आयसोलेशनांत
ऍक्सिओम-४ मोहिमे खाला आंतरराष्ट्रीय अंतराळ स्टेशनांत १८ दीस घालयले उपरांत आयज ते धर्तरेर पावले. अंतराळांतल्यान परतल्या उपरांत तांकां सरळ घरा धाडचे नात. पयलीं तांकां नासाच्या वैजकी आनी पुनर्वसन केंद्रांत दवरतले.
पयले सात दीस कशे आसतले?
अंतराळांतल्यान परतले उपरांत शुभांशु शुक्लाचे पयले ७ दीस खूब जतनायेन आनी शास्त्रीय रितीन तयार केल्ले प्रक्रियेंत सारतले. ह्या काळांत ताच्या शारिरीक क्रियेचेर खासा लक्ष दितले. स्नायू आनी हाडां घटमूट करपा खातीर व्यायाम करतले. हाचे वांगडाच कुडीची संतुलीत पद्दत तपासतले, जाका लागून घुंवळ येवप, तकली दुखप, थकपा सारकिल्लीं लक्षणां पळोवंक मेळटलीं. शास्त्रीय पंगड ताच्या मिशनाक संबंदीत आशिल्ल्या डेटाचें विश्लेशण करतलो. फुडल्या अंतरीक्ष मिशनां खातीर तातूंतल्यान म्हत्वाचें निश्कर्श काडपाक मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
