भांगरभूंय | प्रतिनिधी
आमदार, मंत्र्यांक अधिवेशनांतल्या कामकाजा विशीं मार्गदर्शन
पणजी : मंत्रिमंडळ फेरबदला विशींत चर्चा सुरू आशिल्ल्यान विधानसभा अधिवेशना उपरांतूच निर्णय जातलो. सध्या सरकारांतले मंत्री, आमदार अधिवेशनाचे तयारेंत व्यस्त आसात, अशें प्रदेश भाजप अध्यक्ष दामू नायक हांणी सांगलें.
गोंय विधानसभेचें पावसाळी अधिवेशन २१ जुलय ते ८ ऑगस्ट ह्या काळांत जातलें. अधिवेशनाचे तयारे खातीर भाजपाचे मंत्री, आमदारांची पणजेच्या हॉटेलांत बसका जाली. बसकेक सरकाराक फाटबळ दिवपी आमदार डॉ. चंद्रकांत शेट्ये आनी आंतोन वाझ हजर आशिल्ले. मगोचे फुडारी आनी वीजमंत्री सुदिन ढवळीकार हे गोंयां भायर आशिल्ल्यान बसकेक हजर रावपाक शकले नात.
अधिवेशन १५ दिसांचें जातलें. राज्यपालांच्या अभिभाशणाचेर ह्यान पयलींच चर्चा जाल्ल्यान फाटल्या वर्सा परस ३ दीस उणे केल्यात. अधिवेशनांत येवपी प्रस्न तशेंच विधेयकांविशीं बसकेंत चर्चा जाली. अधिवेशनाची तयारी करपा खातीर आयची बसका आपयिल्ली, अशी म्हायती मुख्यमंत्री डॉ. प्रमोद सावंत हांणी बसके उपरांत दिली.
अधिवेशनाचे तयारे खातीर ही बसका आशिल्ली. हाका लागून अधिवेशनांत येवपी प्रस्न आनी विधेयकां विशीं आमदारांक मार्गदर्शन केलें. मतदारसंघ आनी राज्यांतली समस्या प्रस्नाच्या स्वरूपांत कशे तरेन मांडच्यो, हे बसकेंत स्पश्ट केलें, अशें दामू नायक हांणी म्हणलें.
कायदांमंत्री अलेक्स सिक्वेरा बसकेक हजर नाशिल्ले. तांची प्रकृती सुधारिल्ल्यान अधिवेशना खातीर सभाघरांत ते निश्चीतपणान हजर आसतले, अशें दामू नायक हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
