भांगरभूंय | प्रतिनिधी
मुंबय, खबरां संस्था: महाराष्ट्र सरकारान घेतिल्ल्या एका म्हत्वाच्या निर्णयाक लागून राज्यांतले ओला कंपनीचे ३८५ शोरूम बंद जाल्यात. राज्याच्या परिवहन आयुक्त कार्यालया वतीन सगल्या प्रादेशीक आनी उपप्रादेशीक परिवहन कार्यालयांच्या भरारी पंगडांनी केल्ल्या ओला इलेक्ट्रिक मोबिलिटी सर्व्हिसेस (ओला) कंपनीच्या शोरूम तपासणींत ४३२ शोरूमां मदल्या फकत ४७ शोरूमां कडेन विक्री परवानो आशिल्ल्याचें कळ्ळें. हाका लागून ओलाचे उरिल्ले ३८५ शोरूम बंद केल्ल्याची म्हायती परिवहन विभागान दिल्या.
ही कारवाय कित्याक केली?
परिवहन विभागाच्या नेमां प्रमाण, नोंदणी बगर वाहनां शोरुमांत विक्रे खातीर दवरपाक ट्रेड सर्टिफिकेट घेवप गरजेचें. मात, ओला शोरूमा कडेन हें प्रमाणपत्र नाशिल्ल्यान राज्याच्या परिवहन आयुक्त कार्यालयान तांचे आड कारवाय केल्या. परिवहन आयुक्त कार्यालयांतले सहायक आयुक्त विजय तिराणकर हांणी हे विशीं सरकाराक कारवायेची म्हायती दिली. ओलाच्या शोरूमा कडेन ट्रेड सर्टिफिकेट नाशिल्ल्याची कागाळ प्रीतपाल सिंग हांणी केल्ली. उपरांत केल्ले तपासणे उपरांत हे प्रमाणपत्र नाशिल्ले शोरूम बंद केल्यात. कंपनीन हें प्रमाणपत्र सादर केले उपरांत हे शोरूम सुरू करपाक शकतात, अशें परिवहन आयुक्त कार्यालयान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
