भांगरभूंय | प्रतिनिधी
दिवचल: आमठाणे धरणांतलें व्हाॅव्ह दुरुस्तीचें काम युद्ध पांवड्यार सुरू आशिल्ल्यान आधुनीक तंत्रज्ञानाचो वापर करून हें काम येवपी धा ते बारा दिसांनी पुराय करतले, अशी म्हायती मुख्यमंत्री डॉक्टर प्रमोद सावंत हांणी दिली.
मुख्यमंत्री डॉक्टर प्रमोद सावंत हांणी सोमारा आमठाणे धरण वाठारांत सुरू आशिल्ल्या दुरुस्तीच्या कामाची पळोवणी केली. कंत्राटदार आनी अधिकार्यां मुखार चर्चा करून उत्कृश्ठ दर्जाचें काम करतना तें बेगीनूच पुराय करपाचे आदेश दिले. ह्या वेळार हें काम आधुनीक तंत्रज्ञानाचो वापर करून केल्ल्यान येवपी धा ते बारा दिसांनी तें पुराय जावपाची म्हायती मुख्यमंत्र्यांनी दिली.
दुरुस्तीचें काम पुराय जाले उपरांत ह्या धरणांत रोखडेंच उदक सांठयतलें. गरजेचो जलसंचय करतले अशेंय तांणी सांगलें. जाय तसो पावसूय पडटलो आनी धरण योग्य प्रमाणांत भरतलें अशें मुख्यमंत्र्यान म्हणलें.
हें दुरुस्ती काम हातांत घेतना सगळे तरेची जतनाय घेतिल्ल्यान, ताचे खातीर हेर राज्यांतलयन आधुनीक मशिनरी आनी मनीसबळूय मागलां.
गोंयचे एके नामनेचे कंपनीक ह्या कामाचें कंत्राट दिल्ल्यान तांणी हें काम येवपी धा ते बारा दिसांनी पुराय करपाची हमी दिल्ल्याचें मुख्यमंत्री डॉ. सावंत हांणी ह्या भागाची पळोवणी केले उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
