भांगरभूंय | प्रतिनिधी
काणकोण: काणकोण म्हालांतल्यो वीज, उदक, भलायकी अश्यो मुळाव्यो गरजो भागोवपा खातीर सरकार असमर्थ थारलां. तातूंत जनतेची श्रद्धा आशिल्ल्यो भगवती पठारावेल्यो सुवातो प्रकल्पां खातीर लोलयें, पोळे कोमुनिदाद दिवपाच्या हेतान मुखार धुकल्ल्या. हो कोमुनिदादीच्या १४१ सभासदांचो प्रस्न न्हय तर समेस्त काणकोणच्या लोकांच्या फुडाराचो प्रस्न जावन आसा. तेन्ना भगवती पठार वा माड्डीतळप हांगा खंयचोच प्रकल्प जावपाक दिवचो ना. गोवा फॉरवर्ड पक्ष ताका खरपणान विरोध करतलो. हे खातीर बसकांचें आयोजन करतले अशें गोवा फॉरवर्ड पक्षाच्या पर्यावरण विभागाचे मुखेली विकास भगत हांणी पत्रकार परिशदेंत शिटकावणी दितना सांगलें. ह्या वेळार सरचिटणीस रेमी बोर्जिस हजर आशिल्ले.
मल्लिकार्जुन मल्टी फ्रूट प्रोसेसिंग युनीट उबारपा खातीर सुवात दिता त्या मल्लिकार्जुन मल्टी फ्रूट प्रोसेसिंग यूनिटाचे फकत पांचजाण भागीदार आशिल्ल्यान तातूंत एका राजकारण्याचोय आसपाव आसा. तेन्ना कोमुनिदादान ही जमीन ९९ वर्सांच्या भाडेपट्टीचेर दिवपा खातीर तातूंत कितें तरी घोटाळो जाल्ल्याचो दुबाव येता, असो आरोप भगत हांणी उक्तायलो. फ्रूट प्रोसेसिंग यूनिट घालपाचेंच आसल्यार श्रीस्थळाचे उद्देगीक वसणुकेंत हजारांनी चौ. मिटर सुवात आशिल्ल्यान थंय हें युनीट उबारपाची मागणी भगत हांणी केल्या.
प्रकल्प हाडल्यार गोंयकारांक नोकर्यो मेळटल्यो हो फकत भास. गोंयांत एन. आय. टी आसा, मोपा विमानतळ आसा, थंय कितल्या गोंयकारांक नोकर्यो दिल्यो हें श्वेतपत्रिका काडून जाहीर करचें, असोय उलो भगत हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
