भांगरभूंय | प्रतिनिधी
25 वर्सांची सेवा दिवन कॉन्स्टेबल जावपाक पावले निवृत्त
भांगरभूय । प्रतिनिधी
पणजी : गोंय पुलीस खात्यांत उपनिरिक्षक ते कॉन्स्टेबलाची सेवा दिवपी खूब जाण कितल्याश्याच वर्सां सावन बडटे खातीर पात्र आसून लेगीत बडटी जावंक नाशिल्ल्यान बेजार आसात. कांय कर्मचारी जाल्यार आतां कांय दिसांनी निवृत्त जातले. ताका लागून उण्यांत उणें तांकां तरी बडटी दिवची, असो सूर पुलीस कर्मचाऱ्यां मदल्यान येता. पुलीस खात्यांत बडटे खातीर 2800 परस अदीक कर्मचारी वाट पळयतात, अशी म्हायती मेळ्ळ्या.
मेळिल्ले म्हायती प्रमाण, गोंय पुलीस खात्यांत 2001 त भरती जाल्ले कॉन्स्टेबल 24 वर्सां सेवा दितात. तातूंतल्या मेजक्याच कांय जाणांक बडटी मेळ्ळ्या, मात 350 परस अदीक जाण बडटे पासून पयस आसात. 20 ते 25 वर्सां सावन सेवा दिवपी सुमार 2000 कॉन्स्टेबल बडटे खातीर पात्र आसात. तशेंच सहाय्यक उपनिरिक्षक पदा वयले 200 जाण, जाल्यार उपनिरिक्षकपदार सेवा दिवपी सुमार 225 जाण बडटेची वाट पळयतात. मजगतीं, हे संबंदांत खूबश्या कर्मचाऱ्यांनी पुलीस खात्या कडेन पत्रवेव्हार करून बडटेचो मुद्दो उपस्थीत केला. मात तांचे मागणेची कोणेच दखल घेवंक ना. ताका लागून ते बेजार जाल्यात. खूबशे कर्मचारी फुडल्या कांय म्हयन्यांत निवृत्त जातले. ताका लागून कांय कर्मचाऱ्यांक कॉन्स्टेबलपदा वयल्यानूच निवृत्त जावचें पडटलें.
बडटे खातीर खूब जाणांचें वरिश्ठांक गाराणें
सरकार पुलीस खात्यांतल्या वरिश्ठ अधिकाऱ्यांक, तशेंच हेर खात्यांतल्या कर्मचाऱ्यांक वेळावेळार बडटी दीत आसता. कांय खेपे पदां उपलब्ध नासल्यार तीं तयार करून भरतात. कांय अधिकाऱ्यांक जाल्यार बडटे खातीर गरजेचो सेवाकाळ वर्साची अट सदळ करून बडटी दितात. पुलीस खात्यांतल्या कर्मचाऱ्यांचे बडटेचो मार्ग मेकळो मेकळो करपाची मागणी खूबश्या कर्मचाऱ्यांनी वरिश्ठां कडेन लेखी पत्रां वरवीं केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
