भांगरभूंय | प्रतिनिधी
इंग्लंडा आड चालू आशिल्ले तिसरे टॅस्टीच्या तिसऱ्या दिसा भारताचो पयलो डाव 119.2 ओव्हरींनी 387 धांवड्यांचेर सोंपलो. इंग्लंडाचो पयलो डाव 387 धांवड्यांचेर सोंपिल्लो अशे तरेन पयल्या डावांत कोणाकूच आघाडी मेळूंक ना. तिसऱ्या दिसाचो खेळ सोंपलो त्या वेळार इंग्लंडान बिनबाद 2 धांवड्यो केल्यात. अशे तरेन इंग्लंड दोन धांवड्यांनी मुखार आसा.
ते पयलीं लोकेश राहुलान (100) शेंकडो मारून आनी ऋषभ पंतान (74) आनी रवींद्र जडेजान (72) अर्द शेंकड्यांची खेळी करून भारता बरे स्थितींत हाडपाचो यत्न केल्लो. पूण, सकयले सुवाते वयल्या बॅट्समनांनी आघाडी घेवपाची बरी संद व्हगडायली. भारतान आपल्यो निमाण्यो चार विकेटी फकत 11 धांवड्यांनी व्हगडायल्यो.
इंग्लंडा वतीन क्रिस वोक्सान तीन, जोफ्रा आर्चर आनी बेन स्टोक्स हाणें दरेकी एक विकेट घेतली.
च्या च्या विसवा मेरेन भारतान 5 विकेटी व्हगडावन 316 धांवड्यो केल्ल्यो. त्या वेळार भारत 71 धांवड्यांनी फाटीं आशिल्लो. भारत सहज आघाडी घेतलो अशें दिशिल्लें. पूण, तांकां अपेस आयलें.
जेवणाच्या विसवा उपरांत राहुल बाद जालो. ताका शोएब बशिरान बाद केलो. लॉर्ड्स मैदानार दोन शेंकडे मारपी राहुल पयलो ओपनर थारलो. ताणें 176 बॉलांनी आपलो 10वो शेंकडो पूर्ण केलो. जेवणाच्या विसवा मेरेन भारतान 4 विकेटी व्हगडावन 248 धांवड्यो केल्ल्यो. पयल्या सत्राचेर भारतान आपलो शेक दवरिल्लो. पूण, जेवणाच्या विसवाक कांय मिनटां बाकी आसतना ऋषभ पंत एक धांवडी घेवपाच्या यत्नांत धांवबाद जालो.
ते उपरांत राहुलान लेगीत आपली विकेट रोखडीच व्हगडायली. ते उपरांत रवींद्र जडेजान नितीश रेड्डी वांगडा मेळून डाव मुखार व्हेलो. दोगांयनी 72 धांवड्यांची भागिदारी केली. पूण, दोगूय रोखडेच बाद जाल्या उपरांत भारताचो डाव गडगडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
