भांगरभूंय | प्रतिनिधी
वाळपयः होंडा पुलीस स्टेशना खाला येवपी पिसुर्ले- कुमारखण वाठारांत पुलिसांनी शुक्रारा सांजवेळार धाड घाली. हे कारवायेंत ड्रग्साच्या एका धंदेकाराक अटक केली. ताचे कडल्यान सुमार देड गांजो आनी मोटार जप्त केल्या.
अटक केल्लो मनीस ड्रग्स वेव्हारांत खांपो आसा. फाटल्या कांय म्हयन्यांत ह्या वाठारांत गांजो आनी ड्रग्सांचो वापर आनी विक्री वाडिल्ल्यान थळाव्या लोकांनी हुस्को उक्तायलो. पिसुर्लेंचे सरपंच देवानंद परब हांणीय हे घडणुके विशीं हुस्को उक्तावन पुलिसांनी गंभीर कारवाय करची अशी मागणी केल्या. तरणाटी पिळगी हातूंत घुस्पता आनी पुलिसांनी अशी प्रकरणा आडावपा खातीर ठोस भुमिका घेवची अशें सरपंचान स्पश्ट केलें.
मजगतीं, स म्हयन्यां आदीं होंडा कंडब बस स्टँडा लागसार गांजा विकपाच्या प्रकरणांत कांय तरणाट्यांक अटक केल्ली. हे घडणुकेचेर बेगोबेग खर कारवाय करून हो वाठार ‘ड्रग्समुक्त’ करपाची खर मागणी थळाव्या नागरिकांची आनी ग्रामपंचायतीची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
