भांगरभूंय | प्रतिनिधी
धाकू मडकयकार जातले नवे जिल्हो पंचायत अध्यक्ष
पणजी : उत्तर गोंय जिल्लो पंचायतीचे अध्यक्ष शंकर चोडणकार हांणी अध्यक्षपदाचो राजीनामो दिल्ल्यान उत्तर गोंय जिल्लो पंचायत अध्यक्षपद रितें जालां. सेंट लॉरेन्स जिल्लो पंचायतीचें प्रतिनिधीत्व करपी धाकू मडकयकार हांची अध्यक्षपदार निवड निश्चीत आसा.
चोडणकार हांणी राजीनामो दिल्ल्याच्या वृत्ताक पंचायत संचालकांनी तेंको दिलो. मयें जिल्लो पंचायत मतदारसंघांतल्यान निवडून आयिल्ले चोडणकार हे फाटल्या वर्सा सप्टेंबरांत अध्यक्ष जाल्ले. पक्षाच्या निर्देशा प्रमाण तांणी राजीनामो दिलो अशी म्हायती सुत्रांनी दिली.
डिसेंबर २०२० त वेंचणूक जाले उपरांत सगल्यांत पयलीं सुकूरचे जिल्लो पंचायत वांगडी कार्तिक कुडणेकार हे उत्तर गोवा जिल्लो पंचायतीचे अध्यक्ष जाले. लागीं लागीं १ वर्स २ म्हयने हिने ते अध्यक्ष आशिल्ले. उपरांत सिद्धेश श्रीपाद नायक (खोर्ली) हांचे कडेन अध्यक्षपदाची जापसालदारकी आयली. ते अडेज वर्सां अध्यक्ष आशिल्ले. सिद्धेश नायक हांचे उपरांत शंकर चोडणकार हांची फाटल्या सप्टेंबराक अध्यक्षपदार निवड जाली. तांणी राजीनामो दिल्ल्यान आतां नव्या मनशाची निवड जातली.
धाकू मडकयकार हे ज्येश्ठ वांगडी आसात. तांची निवड निश्चीत आसा. चोडणकार हांची निवड जाली तेन्नाच प्रदेश अध्यक्ष सदानंद शेट तानावडे हांणी धाकू मडकयकार हांकां संदी मेळपाक जाय अशी सुचोवणी केल्ली. ज्येश्ठ वांगडी आशिल्ल्यान अध्यक्ष म्हणून म्हाकाच संद मेळटली असो विस्वास मडकयकार हांणी उक्तायलो.
नव्या अध्यक्षांची निवड करपा खातीर पक्षाची बसका जातली. नव्या अध्यक्षा विशीं पक्ष निर्णय घेतलें, अशी म्हायती आदले अध्यक्ष सिद्धेश नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
