भांगरभूंय | प्रतिनिधी
मगोच्या केंद्रीय समिती वांगड्यांचो विस्वास
पणजी : मगोचे ज्येश्ठ फुडारी सुदीन ढवळीकार जायतीं वर्सां जालीं आमदार आसात. तांचें मंत्रिपद काडून आमदार जीत आरोलकार हांकां मुख्यमंत्री मंत्रिपद दितले, अशें म्हाका दिसना, अशें मत मगोचे खजिनदार अनंत नायक हांणी उक्तायलें. मगोक ह्यान फुडें मंत्रिपद मेळचें ना, ह्या वक्तव्याचो मगोच्या केंद्रीय समिती वांगड्यांनी पत्रकार परिशदेंत निशेध केलो. ह्या वेळार मडकय मतदारसंघांतले आतांचे, आदले जिल्लो पंचायत वांगडी हजर आशिल्ले.
महाराष्ट्रवादी गोमंतक पक्षाचे कार्य राज्यांत जायतीं वर्सां जालीं सुरू आसा. आतांय सगल्या मतदारसंघांत काम सुरू आसा. वीजमंत्री सुदिन ढवळीकार हांणी मडकय मतदारसंघा सयत हेर मतदारसंघांनूय खूब काम केलां. तांच्या कामाची दखल घेवनूच तांकां मंत्रीपद दिलां. हाका लागून ह्यान फुडें मगोक मंत्रिपद मेळचें ना, हें विजय सरदेसाय हांचें वक्तव्य अयोग्य. मगो पक्ष ह्या वक्तव्याचो निशेध करता, अशें बांदोडेंचे सरपंच आनी मगोचे वांगडी रामचंद्र नायक हांणी म्हणलें.
भंडारी समाजांतूय कांय फुडारी फूट घालपाचो यत्न करतात. सुदीन ढवळीकार हांणीय भंडारी समाजा सयत सगल्या समाजां खातीर खूब काम केलां. राजकारणांत समाजाक म्हत्व आसना, अशें रामचंद्र नायक हांणी म्हणलें.
मांद्रेचे आमदार जीत आरोलकार हांकां मंत्रिपद दिल्यार मगो पक्ष ताका येवकार दितले. जीत आरोलकार हे मगोचे आमदार आशिल्ल्या येवपी वेंचणुकेंत मगो उमेदवारीचेर तांचें जैत निश्चीत आसा. मगोचो सरकारांत एक मंत्री आसा. आनीक एक मंत्रिपद मेळ्ळ्यार ताचो पक्षाक फायदो जातलो, अशें भांडारी अनंत नायक हांणी म्हणलें.
पयल्या टर्मांत सुदिन, दीपक मंत्री नाशिल्ले
मगोच्या आमदाराक पयल्या टर्मांत मंत्रिपद मेळचें ना, असो थाराव मगो पक्षान खूब पयलीं घेतला. सुदीन ढवळीकार आनी अध्यक्ष दीपक ढवळीकार हेय आमदारकीच्या पयल्या टर्मांत मंत्री नाशिल्ले, अशे कार्यकारी अध्यक्ष प्रताप फडते हांणी ह्या वेळार स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
