भांगरभूंय | प्रतिनिधी
आयज संवसारीक लोकसंख्या दीस. ते निमतान आमी बायलां, भुरगीं, जाण्टे आनी दुबळ्या लोकसंख्ये खातीर भलायकी समता साध्य करपाक वचनबद्ध जावंया.
दरवर्सा 11 जुलयाक संवसारीक लोकसंख्या दीस मनयतात, जो संवसारीक लोकसंख्येच्या समस्यां विशीं जागृताय करपाचो यत्न करता. संयुक्त राश्ट्रांचे उदरगत कार्यावळीच्या प्रशासकी मंडळान १९८९ वर्सा हो दीस स्थापन केलो.
ताची मोख आशिल्ली, लिंगीक समानतेची शक्त उक्ती करप, संवसारांतल्यो अनंत शक्यतायो तांचे पासत उक्त्यो करपाक बायलां आनी चलयांचो आवाज वाडोवप.
दर वर्सा 11 जुलयाक संवसारीक लोकसंख्या दीस लोकसंख्येच्या प्रस्नांचें म्हत्व आनी प्राधान्य हांचेर लक्ष केंद्रीत करपाचो यत्न करता. पयलेच खेपे ११ जुलय १९९० दिसा ९० परस चड देशांनी ताची थारावणी जाली. संवसारीक पांवड्यार लोकसंख्येचे भलायकेचीं वेगवेगळीं आंगां सोडोवपाक संवसारीक भलायकी संघटना (डब्ल्यूएचओ) म्हत्वाची भुमिका घेता. तातूंत प्रजनन भलायकी, संसर्गजन्य रोग, भलायकी समता, बायलांची भलायकी आनी हेर गजालींचो आस्पाव जाता. आमच्या देशांत, लोकसंख्येक भलायकेच्या विंगड विंगड आव्हानांक लागून डब्ल्यूएचओचे उपक्रम खासा म्हत्वाचे थारतात.
बायलांचें मरण
संयुक्त राश्ट्रांच्या अहवाला प्रमाण एकुणिसाव्या शेंकड्या मेरेन दर दिसा सुमार 800 बायलो गुरवारपणांत आनी भुरग्यांच्या जल्मांत गरजे भायर मरतात. हें सारकें न्ही. खास करून विकसनशील देशांनी हें व्हड प्रमाणार घडटा. कुटुंबांक पोसवण दिवन, अर्थवेवस्थेक चालना दिवन आनी फुडाराक आकार दिवन बायलो समाजांचो फाटीचो कणो नीट दवरतात. शिक्षण, भलायकी, आनी अर्थीक साधनां मेळपाक बायलांक सशक्त करूनच समाज सगळ्यां खातीर उजवाडाच्या फुडाराक वाट मेकळी करूंक पावता. हातूंत प्रजनन भलायकी आनी हक्क बायलां सशक्तीकरणाची बुन्याद म्हूण उबीं रावतात. व्यापक प्रजनन भलायकी सेवा मेळप वैयक्तीक भलायकेची राखण करता आनी व्यापक समाजीक बऱ्यापणा खातीर योगदान दिता. जेन्ना बायलांक आपले कुडी विशीं आनी प्रजनना विशीं माहितीपूर्ण निवड करपाक मेळटा तेन्ना शिक्षण, करिअर आनी आकांक्षा पुराय करपाक तांकां योग्य वातावरण लाभता. देखून बायलांची भलायकी आनी बरेपण सशक्त करप ही टिकावू उदरगती खातीर एक धोरणात्मक गरज आसा. तेच परीन ती नैतिकतेचीय गजाल.
चलये भुरग्या सावन जाण्टे मेरेन बायलांचे भलायकेंत गुंतवणूक करून आमी राश्ट्रांच्या समृध्दींत गुंतवणूक करतात.
आमच्या भुरग्यांच्या बरेपणांत आदीं वाडींत आमी बांदिल्लो समाज आनी आमी सांबाळटात तीं मुल्यां दिसून येतात. दरेका भुरग्याक भंय, आगळीक आनी दुर्लक्ष मुक्त भुरगेपण फावो. आयच्या समाजांत उपेक्षित घटकांतल्या भुरग्यांचेर जावपी हिंसाचाराक शिम-मेर ना. हें शार आनी गांवगिऱ्या वाठारांनी विंगड विंगड तरेन जाता. भुरग्यांचेर, खास करून चलयां आड जावपी हिंसाचार आनी लैंगीक आगळिको आडावप हो सुरक्षीत आनी समतावादी संवसाराचो ताकतिकेचो उलो.
हिंसाचार आडावपाक चालना दिवपाच्या डब्ल्यूएचओ च्या यत्नांत खंड पडपाचीं कारणां वळखुपाक भलायकी क्षेत्रांतलो प्रतिसाद, घरगुती हिंसाचाराच्या बळींची राखण, तशेंच शाळा आनी समाज वाडपाक, नंदपाक आनी शिकपाक सुरक्षीत सुवाती आसात हाची खात्री करप हांचो आस्पाव जाता.
सुरक्षीत वातावरण
समाजांत, शाळांनी आनी भुरग्यां खातीर- खास करून चलीभुरग्या खातीर शारी सुवातींनी, भुरग्यांक उक्तेपणान वावुरपाक सक्षम करपी म्हत्वाचे घटक आसात. सुरक्षीत सुवातींचो प्रसार करून आनी भलायकी सेवा मेळपाची खात्री करून, आमी आमच्या तरणाट्यांक भलायकेन आनी पूर्ण जिवीत जगपाक सशक्त करूंक शकतात. मुक्त वाढीक वाव दिवन चालना दिवपी आनी समाजाची सुरक्षा भावना वाडोवपी सुरक्षीत आनी भलायकेन गिरेस्त शारी सुवात तयार करपाक आमी प्राधान्य दिवंक जाय.
संवसारीक लोकसंख्या दिसा खास करून बायलां आनी भुरग्यांची भलायकी सुदारप हो प्राधान्यक्रम आसा. परंपरेन भलायकी, शिक्षण हातूंत विषमतायेचो त्रास सोंसपी चलयो आनी बायलो, किशोरवयीन आनी दुबळे लोकसंख्या घटक हे टिकावू उदरगतीचे चालक, आनी बदलाचे बळिश्ट एजंट आसात. बायलां आनी चलयांचे भलायकेचेर धोरण थारावन पद्धतशीर गुंतवणूक केल्यार कुटूंबाक आनी एकूण समाजाक खूब फायदो जाता. हाका लागून एकूण तरणाट्यांच्या उदरगतीकच आदार मेळटा – जे फाल्यांचें मनीस भांडवल आसात.
ह्या संवसारीक लोकसंख्या दिसा, आमी फुडल्या वावराची याद करून दिवया, आनी बायलां, भुरगीं, जाण्टे आनी उपेक्षित घटकां सयत दुबळ्या लोकसंख्ये खातीर भलायकी समता साध्य करपाक परतून वचनबद्ध जावंया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
