भांगरभूंय | प्रतिनिधी
गोंयांत जावपी पर्पल महोत्सवाचें दिलें निमंत्रण
पणजीः इंटरनॅशनल पर्पल फेस्टिव्हल- गोंय 2025 च्या तयारीचो भाग म्हूण समाज कल्याण आनी दिव्यांग व्यक्ती सशक्तिकरण मंत्री सुभाष फळदेसाय हांणी राज्य दिव्यांग व्यक्ती आयुक्त गुरूदास पावसकार हांच्या सयत नवी दिल्लींत अधिकृत भेट दिली. ह्या वर्सा 9 ते 12 ऑक्टोबर मेरेन इंटरनॅशनल पर्पल फेस्टिव्हल आयोजीत करपाचे थारायला. “Universal Design – Inclusive Thinking in Action” अशी ह्या वर्साच्या फेस्टिव्हलाची संकल्पना आसा.
गोंयच्या प्रतिनिधी मंडळान दिल्लींत केंद्रीय मंत्र्यांची भेट घेवन इंटरनॅशनल पर्पल फेस्टिव्हलाक येवपाचे आमंत्रण दिले आनी गोंयच्या दिव्यांग व्यक्ति संबंदीत साबार विशयांचेर चर्चा केली. प्रतिनिधी मंडळान दिल्लीच्यो मुख्यमंत्री रेखा गुप्ता, गृहमंत्री आशिष सूद आनी समाज कल्याण मंत्री रविंदर सिंग हांचीय भेट घेतली आनी दिव्यांग व्यक्तिंचे कल्याण आनी सशक्तिकरणा संबंदीत प्रस्नांचेर चर्चा केली. रेखा गुप्ता हांणी पर्पल फेस्टिव्हला विशीं उमळशीक दाखोवन अशा तरेचो उत्सव दिल्लींत आयोजीत करपा खातीर सल्लागार आनी मार्गदर्शन दिवपाची समाज कल्याण मंत्र्याक विनंती केली. दिव्यांगांचे सर्वेक्षण आनी सेवा नियोजनाचेर दिवप घेवप करपाचेरुय चर्चा केली.
ह्या वेळार केंद्रीय दिव्यांग व्यक्ती सशक्तिकरण विभागाचे आनी गोंय राज्यांतले संबंदीत अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
