भांगरभूंय | प्रतिनिधी
युनोक, नोबेल असोसिएशना वांगडा समजिकाय कबलात
भांगरभूंय । प्रतिनिधी
पणजी : विद्यालयीन आनी उच्च माध्यमीक विद्यार्थ्यांक वेवसाय मार्गदर्शन (करिअर गायडन्स) करपाक दरेका म्हालांत वेवसाय मार्गदर्शन शिबिरांचें आयोजन करतले. विद्यार्थ्यांक सगल्या मळांचेर करियर संदींचें मार्गदर्शन मेळपा खातीर राज्य शिक्षण संशोधन आनी प्रशिक्षण मंडळान युनोक आनी नोबेल असोसिएशना वांगडा समजिकाय कबलात (एमओयू) केल्या. विद्यार्थ्यांनी ह्या शिबिरांचो चडांत चड प्रमाणांत लाव घेवचो, असो उलो मुख्यमंत्री डॉ. प्रमोद सावंत हांणी मारला.
डॉ. सावंत हांचे हाजेरेंत पर्वरी मंत्रालयांत ही कबलात जाली. ह्या वेळार राज्य शिक्षण संशोधन आनी प्रशिक्षण मंडळाची (एससीईआरटी) संचालक मेघना शेटगांवकार, युनोकचे अधिकारी धवल गांधी आनी हेर मानेस्त हाजीर आशिल्ले.
सुरवातीक बारावेच्या सगल्या विद्यार्थ्यां खातीर म्हाल पांवड्यार वेवसाय मार्गदर्शन शिबिरां जातलीं. कला, वाणिज्य, विज्ञान आनी वेवसायीक ह्या सगल्या फांट्यांच्या विद्यार्थ्यां खातीर दरेका म्हालांत शिबिरां जातलीं. हाचो 20 हजारां परस चड विद्यार्थ्यांक लाव जातलो. आयुष संस्थेंत गोंयच्या विद्यार्थ्यां खातीर 50 टक्के सुवात राखीव आसात. आंतरराष्ट्रीय कायदो विद्यालयांतूय राखीव सुवात आसा. ह्या दोनूय महाविद्यालयांत गोंयकार विद्यार्थी प्रवेश घेनात, अशी खंत डॉ. सावंत हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
