भांगरभूंय | प्रतिनिधी
आरजीपीची सायबर फाट्यांत कागाळ दाखल
पणजीः रेव्ह्युलेशनरी गोवन्स पक्षाचे मुखेली मनोज परब हांच्या बापायाक लक्ष करपी फटीची बातमी पातळावपी व्हिडीयो विशीं आरजीपीन सायबर क्रायमांत कागाळ दाखल केल्या. कांय जाण युट्युबाचेर मनोज परब हांचे बाबा भारत परब हांचे आड फटीचे आनी बदनामी करपी व्हीडीयो शॅर करतात. तांचेर कारवाय करपाची मागणी आरजीपीच्या शिश्टमंडळान केली.
आरजीपीच्या शिष्टमंडळान बुधवारा युट्यूब व्हिडीयोचें लिंक आनी पोस्टरांचे प्रती सयत रायबंद सायबर गुन्यांव फांट्यात कागाळ दाखल केली. कागाळ दाखल केले उपरांत आरजीपीचे सरचिटणीस विश्वेश नायक हांणी सांगलें, आरजीचें नांव पेड्ड्यार करपा खातीर सोशल मिडीयाचेर नाका जाल्ले पोस्ट कांय जाण व्हायरल करतात आनी आतां ते आरजीच्या फामिलीच्या वांगड्यांक लक्ष करपाक लागल्यात.
विवीध सोशल मिडीया माध्यमांचेर फटीचे पोस्टर आनी व्हिडीयो प्रसारीत जावपाक लागल्यात. तातूंत मनोज परब हांच्या बापायचें नांव अष्टगंधा क्रेडीट सोसायटीच्या गुड्डूलुसांवा कडेन जोडपाचो यत्न चल्ला. जे मनीस हे गुड्डूलुसांवांत गुंथल्यात ते दुसरेच व्यक्ती जावन आसा आनी तांचो मनोज परब वा तांचे फामिली कडेन कसलोच संबंध ना, अशें विश्वेश नायक हांणी स्पश्ट केलें.
आरजीपीक वाडटो तेंको आनी मनोज परब हांच्या फुडारपणाचो वाडटो प्रभाव पळोवन आमचे विरोधी भियेल्यात हें स्पश्ट दिसून येता आनी तांणी आमकां बदनाम करपाचो यत्न चलयला. तांकां आपली कापास्दाद सिध्द करपाची तांक ना देखून पक्ष आनी अध्यक्षाची बदनामी करपा खातीर फटीची खबर पसरोवपाचे नाका जाल्ले यत्न चल्ल्यात, असो आरोप नायक हांणी केलो.
ज्या फुडार्यांनी आपली जीण गोंय आनी गोंयकारां खातीर समर्पीत केल्ले तांंचे अब्रुचें लुकसाण करून लोकांची दिशाभूल करपाच्या यत्नाचो आरजीपी निशेध करता. जांणी कोणी ही बदनामीची मोहीम चलयल्या तांकां ख्यास्त घडोवन हाडची, अशी मागणी नायक हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
