भांगरभूंय | प्रतिनिधी
पणजी : केंद्र आनी राज्य सरकाराच्या विवीध येवजण्यांक लागून बायलो अर्थीक नदरेन सक्षम जातात. ह्यो येवजण्यो बायलां सशक्तीकरणा सयत तांकां मानाची जीण दिता अशें मुख्यमंत्री डॉ. प्रमोद सावंत हांणी सांगलें. मंगळारा ग्रामीण विकास खात्या वतीन पणजे आयोजीत अनुभूती हे बसकेच्या उक्तावणा वेळार ते उलयताले. ह्या वेळार केंद्रीय संयुक्त सचिव श्रुती शरण, सहसचीव डॉ. मोनिका, राज्य सचीव संजय गोयल हजर आशिल्ले.
मुख्यमंत्र्यान मुखार म्हणलें, प्रधानमंत्री नरेंद्र मोदी हांणी २०१४ सावन बायलां सशक्तीकरणा खातीर विवी येवजण्यो सुरू केल्यात. हाचे वरवीं वाटेकार जावपी बायलांचो आंकडो वाडलो आनी तांची उदरगत जाली. फाटलीं ११ वर्सां डबल इंजिन सरकारान जितली उदरगत केली तितली ६० वर्सांनीं जावंक नाशिल्ली. सरकार फकत मुळाव्या सुविधांची उदरगत करताच, तशेंच मनीसबळाची उदरगतूय करता. गोंय सरकारान केंद्राच्या १३ फ्लॅग शिप प्रकल्पां मदले ८० प्रकल्प हे १०० टक्के पुराय केल्यात, अशें करपाक गोंय देशांत मुखार आसा.
तांणी म्हणलें, राज्यांत ३२५० बायलो स्वयं सहाय्यता गटां मदल्या ११२० गटांनी सुमार ३५० कोटी रुपयांचें रीण घेतलां. हेर गटांनी बँकां वांगडा लिंकेज केल्यार तांकांय रीण मेळपाक शकता. राज्यांतल्या बायलां स्वयं सहाय्यता गटांनी ९०० कोटी रुपयां मेरेन रीण घेवपा खातीर यत्न करचे. दादल्यांच्या गटाचे तुळेंत बायलां गटांची रीण फारीक करपाची टक्केवारीय चड आसा. हाका लागून बँकोय तांकां रोगडेंच रीण दितात. गोंयांत राष्ट्रीय ग्रामीण विकास मिशन अदीक प्रभावीपणान राबयतात.
गोंयांत स्पिरूच्यअल पर्यटन
गोंय आतां मेरेन फकत सन, स्यांड आनी सी ह्या तीन एस खातीर वळखतात. आतां हातूंत भर पडल्या. गोंयांत स्पिरूच्यअल पर्यटनूय सुरू जाल्ल्याचें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
