भांगरभूंय | प्रतिनिधी
म्हापशें : फोंडेकवाडो, पर्रा सुरू आशिल्ले एके बांदकाम सायटीचेर रावपी खोपींत ओडिसाच्या ३५ वर्सां पिरायेच्या एका कामगाराचो खून जालो. मरण आयिल्ल्याचे दोग वांगोडी मंगळार सकाळीं मेरेन फरारी आशिल्ले. उपरांत पुलिसांनी तांकां ताब्यांत घेतले. ह्या दोगांयनी ताचो खून केल्ल्याचो दुबाव आसा.
सोमारा ७ तारखेर रातच्या सुमार १० वरांचेर ही घडणूक उक्तडार आयली. मरण आयिल्ल्याच्या वांगोड्यांनी ताचो लोखणाचें रॉड आनी सुरयेन हल्लो करून खून केला. दुबावितांनी ताची तकली, शरिराचे हेर भाग आनी गुप्त आंगाचेरूय वार केल्यात. हातूंत बरेंच रगत वचून त्या कामगाराक जाग्यारूच मरण आयलें. हे घडणुके उपरांत दुबावितांनी थंयच्यान पळ काडली. मरण आयिल्ल्या कामगाराचें आनी फरार जाल्ल्या ताच्या वांगड्यांचीं नांवां बांदकाम कंत्राटदार वा हेर कामगारांक खबर नात. मात ते ओडिसाचे आशिल्ल्याचें म्हणटात.
चार-पांच दिसां आदीं ह्या तिगांकूय बांदकामा खातीर हाडिल्ले. तेन्नाच्यान मरण आयिल्लो कामगार आनी ताचे दोग वांगोडी हे तिगूय थंयचे खोपींत रावताले. काल दनपारच्यान दुबावीत आनी मरण आयिल्ल्या मदीं वाद सुरू आशिल्ले.
सोमारा रातीं बांदकाम प्रकल्प सुपरवायझरान आपल्या एका कामगाराक घडणुके सुवातेर त्या कामागारांक पळोवपाक धाडिल्ले. तेन्ना हो खुनाचो प्रकार उक्तडार आयलो.
खोपींत मरण आयिल्ल्या कामगाराची रक्तान माखिल्ली कूड दिसली. रोखडेंच तांणी १०८ ऍम्बुलन्सीक फोन केलो. उपरांत ऍम्बुलन्सींतल्यान कामगाराक म्हापशें जिल्लो हॉस्पिटलांत दाखल केलो. थंय ताका दोतोरांनी मरण आयिल्ल्याचें सांगलें. हे घडणुकेची म्हायती मेळटांच म्हापशें पुलीस निरीक्षक निखील पालेकार आनी वांगड्यांनी घडणुके सुवातेर वचून पंचनामो केलो. कामगाराची कूड गोमेकॉंत पोस्टमार्टमा खातीर धाडल्या. मजगतीं पुलिसांनी दोगांय दुबावितांक ताब्यांत घेतल्यात. सध्या ह्या प्रकरणाचो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
