भांगरभूंय | प्रतिनिधी
जीवघेणो हल्लो प्रकरणाचो पुलीस तपास झुजां पांवड्यार
भांगरभूंय । प्रतिनिधी
वाळपय : सालेली सत्तरी वाठारांत बुरखो घातिल्ल्या दोगांनी घरांत घुसून एके बायलेचेर चाकवान हल्लो केलो आनी भांगराच्यो वस्ती फारायल्यो. पुलिसांक म्हायती दिले उपरांत तांणी झुजां पांवड्यार तपासकाम सुरू केलां. ह्या प्रकरणांतल्या दुबावितांक बेगिनात बेगीन धरचे, अशी मागणी थळाव्या लोकांनी केल्या.
ह्या प्रकरणांत खोलायेन तपास करपाची खूब गरज आसा. कारण जे पद्दतीन बुरखो घालून आयिल्ल्या दोगांनी वैशाली पेडणेंकार हिचेर चाकवान हल्लो करून घरांतल्यो भांगराच्यो वस्ती फारयल्यात, हें पुलिसां वांगडा थळाव्या लोकांक लेगीत एक आव्हान आसा, अशें मत लोकांनी उक्तायलां.
मेळिल्ले म्हायती प्रमाण आयतारा सकाळीं दोग दुबावीत बुरखे घालून दुचाकी वयल्यान आयले. तांणी वैशाली पेडणेंकार हिच्या घरांत घुसून तिचेर चाकवान हल्लो केलो आनी घरांतल्यो सुमार अडेज लाखांच्यो भांगराच्यो वस्ती फारायल्यो. सालेली गांवांत दिसा उजवडी अशी चोरी करपाचो प्रकार हो खऱ्यांनीच आव्हान दिवपी थारला. हे विशींची कागाळ वैशाली पेडणेंकार हिचो घरकार साईनाथ पेडणेंकार हांणी होंडा पुलीस स्टेशनार केल्या.
पुलिसांनी हे संबंदांत तपास करतना वास काडपी सुण्यांच्या पंगडाचो वापर केलो, मात काल उसरां मेरेन दुबावितांक ताब्यांत घेवंक नाशिल्ले. गांवगिऱ्या वाठारांत दिसा उजवडी अशें प्रकार घडूंक लागिल्ल्यान थळाव्या लोकांनी हुस्को उक्तायला. शारां वांगडाच गांवगिऱ्या वाठारांत रावपी लोकां मुखार सुरक्षेचो प्रस्न निर्माण जाला.
मजगतीं, थळाव्या लोकांनी दिल्ले म्हायती प्रमाण दिसा उजवडी अशे तरेन सालेली सारक्या गांवांत बुरखो घालून, दुचाकी वयल्यान येवन अशे तरेन बायलेचेर हल्लो करप आनी भांगरांचे वस्तींची चोरी करप, हे एक अजापूच. जे पद्दतीन बुरखो घालून हल्लो केला आनी चोरी केल्या तें पळयत जाल्यार ह्या प्रकरणांत थळाव्या वाठारांतल्या लोकांचो आस्पाव आसपाची शक्यताय थळाव्या लोकांनी उक्तायल्या. ह्या प्रकाराक लागून सालेली गांवा वांगडाच होंडा, मोर्ले ह्या वाठारांत लेगीत भिरांतीचें वातावरण पातळ्ळां. कारण ह्या गांवांतल्या घरांनी घरकार कामाक गेले उपरांत बायलां एकटींच घरांत आसतात. हाका लागून चोरीचे प्रकार फुडारांत आनीक वाडपाची शक्यताय भायर मारूंक जावची ना. अशे तरेचे चोरयांचे प्रकार शारांत जाताले, आतां गांवगिऱ्या वाठारांतूय अशे तरेन हल्लो आनी चोरी जाल्ल्यान गांवगिऱ्या वाठारांतले सुरक्षेचो प्रस्न साणीर आयलां, अशें मत गांवच्या लोकांनी उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
