भांगरभूंय | प्रतिनिधी
दिलीप सरदेसाय स्पोर्ट्स एक्सलन्स पुरस्कार
पणजी: खेळां आनी युवा वेव्हार संचालनालयान 2024- 2025 ह्या वर्सा खातीरच्या ‘दिलीप सरदेसाय स्पोर्ट्स एक्सलन्स पुरस्कारा’ खातीर गोंय खेळां प्राधिकरणाची मान्यताय आशिल्ल्या संबंदीत राज्य पांवड्यावयल्या खेळां संघटणां वरवीं पात्र खेळगड्यां कडल्यान अर्ज मागयल्यात.
गोंयचे क्रिकेट खेळगडे दिलीप सरदेसाय हांकां आदरांजली म्हूण सरकारान हो पुरस्कार सुरू केला. कांस्या प्लेक, सन्मानपत्र आनी 2 लाख रूपया अशें पुरस्काराचें स्वरूप आसा. फाटल्या वर्सा म्हळ्यार एप्रील 2024 ते 31 मार्च 2025 मेरेनच्या काळांत मान्यताय प्राप्त आंतरराष्ट्रीय वरिश्ठ पांवड्यावयल्या खेळां सर्तींत जशें ऑलिंपीक, संवसारीक सर्त, आशियाई खेळ, कॉमन वेल्थ गेम्स आनी हेर आंतरराष्ट्रीय मान्यताय प्राप्त खेळां सर्तींनी भारताचें प्रतिनिधित्व करून बरें येस मेळयिल्ल्या गोंयच्या खेळगड्यांक हो पुरस्कार भेटयतात. खेळगडो उण्यांत उणो 15 वर्सां गोंयांत राबितो करपी आसपाक जाय.
विहीत नमुन्यांतले अर्ज खेळां आनी युवा वेव्हार संचालनालय, कांपाल पणजी हांगच्यान सकाळीं 10 ते सांजेच्या 5 वरां मेरेन मेळटले. पुराय भरिल्ले आनी शिफारस करपी अधिकारीणीन प्रमाणीत केल्ले अर्ज खेळां कामगिरीच्या प्रमाणपत्रां सयत 31 जुलय मेरेन खेळां आनी युवा वेव्हार संचालनालय, कांपाल पणजी स्वता सुपूर्द करपाक जाय. उपरांत आयिल्ल्या अर्जांचो विचार जावचो ना, अशें कळीत केलां.
संगीत नाटक अकादमी आनी उस्ताद बिस्मिल्ला खान युवा पुरस्कार
संस्कृती मंत्रालयाच्या राष्ट्रीय संगीत, नृत्य आनी नाट्य अकादमीच्या संगीत नाटक अकादमीन 2024 आनी 2025 वर्सा खातीरच्या संगीत नाटक अकादमी पुरस्कार आनी उस्ताद बिस्मिल्ला खान युवा पुरस्कारा खातीर अर्ज मागयल्यात. नामांकनां आनी स्वयं-नामांकनां अशा दोन प्रकारांतल्यान https://www.sangeetnatk.gov.in/award-honours/nomonation चेर ऑनलायन अर्ज मागयल्यात. अर्ज स्विकारपाची निमाणी तारीख 14 जुलय 2025 आसा. चड म्हायती खातीर www.sangeetnatak.gov.in हे वेबसायटीचेर भेट दिवची म्हूण कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
